हङ्गेरीकी राष्ट्रपति पोल्याण्ड भ्रमणमा

हङ्गेरीकी नवनिर्वाचित राष्ट्रपति कटालिन नोभाकको पहिलो विदेश भ्रमणका क्रममा पोल्याण्ड पुगेकी छिन् ।

दुई देशको सम्बन्धलाई थप बलियो बनाउन भन्दै उनले मङ्लबारदेखि पोल्याण्डको भ्रमण सुरु गरेको अधिकारीहरुले जानकारी दिएका छन् ।आफ्ना समकक्षी तथा पोल्याण्डका राष्ट्रपति अन्द्रेई डुडाको निमन्त्रणामा उनले औपचारिक भ्रमण गरेको जनाइएको छ । भ्रमणका क्रममा हङ्गेरीकी राष्ट्रपति नोभाकले पोल्याण्डका प्रधानमन्त्री मातियस मोरावेस्कीसँग पनि भेटवार्ता गरेकी छिन् ।

राष्ट्रपतिको रुपमा सपथ ग्रहण गरेको तीन दिनपछि नै उनले विदेश भ्रमण सुरु गरेकी हुन् ।

पोल्याण्डका राष्ट्रपति डुडासँगको संयुक्त पत्रकार सम्मेलनमा नोभाकले भनिन्, ‘पोल्याण्ड र हङ्गेरीको सम्बन्धलाई विषेश महत्व दिँदै थप बलियो बनाउने उद्देश्यले मेरो सबैभन्दा पहिलो वैदेशिक भ्रमण पोल्याण्डबाट गरेकी हुँ ।’

दुई देशका विचमा भएका कतिपय असमझदारीहरुलाई पनि आपसी छलफलबाट समाधान गर्न सकिनेमा उनले जोड दिएकी छिन् ।

परम्परागत साझेदारहरु हङ्गेरी र पोल्याण्डबीच पछिल्लो समय  धेरै विषयमा मतान्तर रहँदै आएका छन् । पछिल्लो समय युक्रेनमाथी रुसले गरेको आक्रमणको विषयमा पनि दुई देश दुई विपरित कित्तामा उभिएका छन् ।