पाकिस्तानमा आज नयाँ प्रधानमन्त्री चयन हुने

काठमाडौँ । पाकिस्तानको संसदले सोमबार नयाँ प्रधानमन्त्री चयन गर्दैछ । इरान खान संसदमा विश्वासको मत प्राप्त नगरेपछि सत्ताच्यूत भएका थिए ।नयाँ प्रधानमन्त्रीका लागि (पाकिस्तान मुस्लिम लिग नवाज) पिएमएलएनका शहबाज शरिफले मनोनयन दर्ता गरेका छन् ।

उनले गठबन्धनको नेतृत्व गरेर ६९ वर्षका खानलाई प्रधानमन्त्रीबाट हटाउन प्रमुख भूमिका खेलेका थिए । नयाँ प्रधानमन्त्री चयनका लागि नेपाली समय अनुसार दिउँसो पौने ३ बजे संसदमा मतदान हुनेछ ।

७० वर्षका शहबाज शरिफ यसअघि तीनपटक प्रधानमन्त्री बनेका नवाज शरिफका भाइ हुन् । शरिफलाई पाकिस्तान पिपुल्स पार्टी (पिपिपी) का अध्यक्ष बिलावल भुट्टो जर्दारीसहितको समर्थन रहने छ ।संसदमा नयाँ प्रधानमन्त्री चयनको प्रक्रिया सुरु भए पनि इमरान खानका समर्थकले भने देशका प्रमुख शहरमा प्रदर्शन गरेका छन् ।अमेरिकाको सहयोगमा विपक्षी दलले आफूलाई सत्ताबाट हटाएको आरोप उनले लगाउँदै आएका छन्।