रुसद्वारा युक्रेनी शहर लभिभमा क्रुज क्षेप्यास्त्र प्रहार

एजेन्सी । रुसी फौजले पश्चिमी युक्रेनी शहर लभिभमा आक्रमण लक्षित गर्न थालेको छ । आइतबार रुसी रक्षा मन्त्रालयले त्यहाँ अत्याधुनिक क्रुज क्षेप्यास्त्र प्रहार गरिएको पुष्टि गरेको छ ।

रुसी फौजले लभिभ नजिक युक्रेनी फौजले प्रयोग गरिरहेको इन्धन भण्डारमा लामो दूरीका क्षेप्यास्त्र प्रहार गरेको छ । यसैगरी, विमानभेदक प्रणाली, रडार स्टेसन्स र टैंकको दृष्टि मर्मत गर्न प्रयोग भइरहेको कारखानामा क्रुज क्षेप्यास्त्र प्रहार गरिएको रक्षा मन्त्रालयले पुष्टि गरेको छ ।

मन्त्रालयका प्रवक्ता इगोर कोनासेनकोभले रुसी महासंघको सशस्त्र फौजले विशेष सैनिक अभियानानुसार आक्रमण कार्यलाई जारी राखेको बताएका छन् । रक्षा मन्त्रालयले लभिभ शहरमा क्षेप्यास्त्र प्रहार हुँदै गरेका भिडियो पनि सार्वजनिक गरेको छ । नेटो सदस्य राष्ट्र पोल्याण्डदेखि मात्र ६० किमि टाढा रहेको लभिभका अधिकारीहरूले क्षेप्यास्त्र आक्रमणमा मानिस घाइते भएको बताएका छन् ।

रुसले युक्रेनको राजधानी किभनजिकका एस-३०० क्षेप्यास्त्रहरू र विमानभेदक क्षेप्यास्त्र प्रणाली ध्वस्त पार्न समुद्रबाट लामो दूरीका क्षेप्यास्त्रहरू पनि प्रहार गरेको छ ।