रुसको आक्रमणमा परि युक्रेनका ७० सैनिकको एकै स्थानमा मृत्यु

एजेन्सी । रुसले गरेको तोप आक्रमणका  युक्रेनका ७० सैनिकको मृत्यु भएको छ । रुसको आक्रमणबाट युक्रेनको उत्तर–पूर्वी शहर ओख्तिर्कामा यि सैनिक मारिएका छन्।

सोमबार रुसले प्रहार गरेको तोपका कारण ठूलो संख्यामा हताहती भएको स्थानीय अधिकारीलाई उद्धृत गर्दै अन्तर्राष्ट्रिय सञ्चारमाध्यमले जनाएका छन् ।

सुमी राज्यका प्रशासनिक प्रमुख डिमित्रो ज्हिभिट्स्कीका अनुसार रुसी तोपले युक्रेनी सेनाको युनिट नै ध्वस्त पारेको हो । भग्नावशेषबाट शव निकाल्न स्वयम् सेवी तथा उद्धारकर्मीहरु खटिएका छन् ।

घटनामा रुसी सेना (शत्रु) तर्फ पनि ठूलो क्षति भएको उनले बताएका छन् । रुसी शवहरु रेडक्रसलाई जिम्मा लगाइएको उनले उल्लेख गरेका छन् । रुसले गएको बिहीबारदेखि युक्रेनमा आक्रमण गर्दै आएको छ ।