बानियाँ भर्सेस केसी : बागमतीमा मतगणना सुरु

मकवानपुर । नेपाली काँग्रेस बागमती प्रदेश सभापतिका लागि भएको दोस्रो चरणको मतदानको मतगणना सुरु गरिएको छ । हेटौँडामा  आइतबार साढे १ बजेबाट सुरु भएको मतदान साँझ साढे पाँच बजे सम्पन्न भएपछि आवश्यक प्रक्रिया पुरा गरेर ७ बजेदेखि मतगणना सुरु गरिएको हो । निर्वाचन समितिका अनुसार बागमती प्रदेशमा २०२५ मत खसेको छ ।

शनिबार भएको मतदानमा तीन जनाबीच प्रतिस्पर्धा हुँदा पनि कुनै उम्मेदवारले पनि ५० प्रतिशतभन्दा बढी कटाउन नसकेपछि पुनः मतदान भएको थियो । पहिला चरणमा सभापति शेरबहादुर देउवा पक्षका इन्द्र बानियाँ, वरिष्ठ नेता रामचन्द्र पौडेल पक्षका जगदीश्वर नरसिंह केसी र कृष्णप्रसाद सिटौला समूहबाट भीमसेन दास प्रधान प्रतिस्पर्धामा थिए ।

पहिलो चरणमा तेस्रो भएका प्रधानले पहिलो भएका बानियाँलाई दोस्रो चरणमा साथ दिएका छन् । प्रधानको साथ पाएपछि आफू जित्नेमा बानियाँ पक्ष विश्वस्त छ । यता पौडेल समूहले भने सिटौला टीमको केही भोट र काठमाडौं र नुवाकोटबाट पहिलो चरणमा गुमेको मत दोस्रो चरणमा पाएर जित्ने दावी गरेको छ।