एमालेको विधान महाधिवेसनप्रति डा भट्टराई र संग्रौलाको यस्तो कटाक्ष

काठमाडौँ । पूर्वप्रधानमन्त्री एवं जनता समाजवादी पार्टीका नेता डा बाबुराम भट्टराई र बरिष्ठ साहित्यकार खगेन्द्र संग्रौलाले शुक्रबारदेखि शुरु भएको नेकपा एमालेको प्रथम विधान महाधिवेशनमाथि कटाक्ष गरेका छन् । खास गरी एमाले अध्यक्ष केपी शर्मा ओलीको फोटो राखेर गरिएको तडक–भडक एवं कार्यकर्ताले गरेको स्कटिङप्रति डा भट्टराईले निभ्ने बेलाको बत्तीको संज्ञा दिएका छन् । लेखक संग्रौलाले ‘कम्युनिस्टका नामको कलंक’ भनेर कटाक्ष गरेका छन् । 

सामाजिक सञ्जालमा टिप्पणी डा भट्टराई लेख्छन्, ‘खड्गप्रसादको कुम्भमेला निभ्ने बेलाको बत्ती हो । लूटको धन फुपूको श्राद्ध गरेर सोझा जनतालाई केही समय भ्रममा पार्न सकिएला तर अन्तमा देशले ठूलो मूल्य चुकाउनुपर्नेछ । नक्कली राष्ट्रवाद, नृजातीय अहंकारवाद, पपुलिज्म र व्यक्तिपूजाको ककटेलले अन्तः स्टालिन, हिटलर र फासीवाद जन्माउने हो । चेतना भया !’

त्यसैगरी साहित्यकार खगेन्द्र संग्रौलाले केपी ओलीमाथि कटाक्ष गर्दै भनेका छन्, ‘बालकोट–गोदावरी बाटाभरि ओलीका फोटैफोटा । लामबद्ध भक्तद्वारा ओलीको गोदावरी सवारी चलान । मञ्चमा न मार्क्स, न पुष्पलाल । मञ्चमा केवल ओली, बोतलमा ओली । ६ हजारको भीडमा एक राजा, अरू प्रजा  एक देवता, अरू दास । एक प्रभु ओलीको देवत्वकरणमा ६ हजार भक्तको दासत्वकरण । हैट, कम्निस्ट नामको यो कलङ्क !