अस्ट्रेलियामा ५.८ म्याग्निच्युडको भूकम्प

एजेन्सी

बुधबार, ०६ असोज २०७८, १२ : ३६
अस्ट्रेलियामा ५.८ म्याग्निच्युडको भूकम्प

एजेन्सी । अस्ट्रेलियाको दक्षिण पूर्वी क्षेत्रमा ५.८ म्याग्निच्युडको भूकम्प गएको छ । भूकम्पका कारण मेलबर्नसहितका सहरमा भवनहरु भत्किएका छन् ।

स्थानीय समयअनुसार बुधबार बिहान ९ बजेर १५ मिनेटमा भिक्टोरिया राज्यको राजधानी मेलबर्ननजिकैको म्यान्सफिल्डलाई केन्द्रबिन्दु बनाएर भूकम्प गएको हो ।  

प्रधानमन्त्री स्कट मोरिसनले भूकम्पका कारण कोही पनि गम्भीर घाइते भएको जानकारी नआएको बताएका छन् ।  उनका अनुसार अग्ला भवनमा रहेका मानिसहरूलाई सुरक्षित स्थानमा सारिएको छ । केही ठाउँमा बिजुली अवरूद्ध भएको पनि बताइएको छ । 

भूकम्पको धक्का न्यू साउथ वेल्ससहितका क्षेत्रमा पनि महसुस भएको बीबीसीले जनाएको छ । सयौं किलोमिटर टाढाका सिड्नी, एडलेइडलगायत सहरसम्म पनि धक्का महसुस भएको थियो । 

भिक्टोरिया राज्यको आपतकालीन सेवाले राज्यका सबै नागरिकले भूकम्पको धक्का महसुस गरेको उल्लेख गर्दै सुनामीको कुनै खतरा नरहेको भन्दै ट्वीट गरेको छ ।