तालिबानका सह संस्थापक बरादर काबुल पुगे, सरकार बनाउनका लागि गर्नेछन् कुराकानी

काबुल  । अफगानिस्तानमा नयाँ सरकारको गठनको उद्देश्यले तालिबानका सह संस्थापक मुल्ला अब्दुल गनी बरादर काबुल पुगेका छन् । 

काबुलमा उनी तालिबानका अन्य सदस्य र नेतासँग कुराकानी गर्नेछन् । 

तालिबानका एक वरिष्ठ अधिकारीले सामाचार एजेन्सी एएफपीसँगको कुराकानीमा भने, ‘उनले एक समावेशी सरकार स्थापनाका लागि काबुलको जिहादी नेता र अन्य मानिसहरुलाई भेट्नेछन् ।’

मुल्ला गनी बरादरलाई सन् २०१० मा पाकिस्तानबाट पक्राउ गरिएको थियो । सन् २०१८ मा उनलाई कतार पठाइएको थियो । बरादरलाई दोहामा अमेरिकी सैनिकको फिर्ताको सम्झौतामा हस्ताक्षरका लागि तालिबानको राजनीतिक कार्यालयका प्रमुख नियुक्त गरिएको थियो । 

मुल्ला गनी बरादर मंगलबार कतारबाट अफगानिस्तानको दोस्रो ठूलो शहर पुगेका थिए जसलाई तालिबानको जन्मस्थल पनि मानिन्छ । तालिबानले काबुलमा कब्जा गरेको केही घण्टाभित्रे यसपटक उनीहरुको शासन ‘भिन्न’ हुने बताएका थिए ।