अफगानिस्तान पूर्णरुपमा तालिवानको नियन्त्रणमा, राष्ट्रपति घानी देश छाडेर भागे

एजेन्सी । अफगानिस्तान यतिबेला पूर्णरुपमा तालिवानको नियन्त्रण नजिक रहेको छ । यहीबीच आइतबार राष्ट्रपति अशरफ गानी देश छाडेर भागेका छन् । रिपोर्टअनुसार उपराष्ट्रपति अमिरुल्लाह सालेहले पनि काबुल छाडेका छन् । 

सुरुवाती रिपोर्टमा उनी ताजकिस्तानतर्फ भागेको उल्लेख गरिएको थियो । यसबारे अहिलेसम्म औपचारिक जानकारी दिइएको छैन । अल जजिराको पछिल्लो रिपोर्टअनुसार गानी, उनकी पत्नी, सेना प्रमुख र राष्ट्रिय सुरक्षा सल्लाहकार उज्वेकिस्तानको राजधानी पुगेका छन् । राष्ट्रपतिको व्यक्तिगत सुरक्षागार्डलाई हवला दिँदै अलजजिराले यस्तो उल्लेख गरेको हो । 

यसैबीच गानीले फेसबुकमा एक पोस्ट सार्वजनिक गर्दै काबुल छाड्नु एक कठिन निर्णय भएको बताएका छन् । रक्तपात रोक्नका लागि आफूले काबुल छाडेको उनको भनाइ छ ।   उनको दावीअनुसार तालिवान काबुल प्रवेश गरेपछि झडपमा लाखौको ज्यान जान सक्थ्यो । 

उनले भनेका छन्, ‘आज मलाई एक कठिन निर्णय लिनुपर्ने अवस्था आइपर्यो । मैले कि तालिवानको सामना गर्नुपथ्यो कि त रक्तपात रोक्न देश छाड्नुपथ्र्यो ।’ आफूले देश नछाडेको भए देशमा ठूलो मानविय त्राशदी हुने उनको भनाइ छ । तरबार र बन्दुकको बलमा तालिवान सत्तामा पुगेको र अब जनताको जिवत रक्षा गर्ने दायित्व उसैको हुने गानीको भनाइ छ ।