प्रतिनिधिसभा पुनः स्थापना भए लगत्तै देउवाले बोलाए काँग्रेस शीर्ष नेतालाई बुढानीलकण्ठमा

काठमाडौँ । सर्वोच्च अदालतले प्रतिनिधिसभा पुनः स्थापना गरेपछि काँग्रेस सभापति शेरबहादुर देउवाले विपक्षी गठबन्धनका नेताहरूसँग छलफल गर्दै छन् ।

देउवाले पार्टीका शीर्ष नेताहरूलाई आफ्नो निवास बुढानीलकण्ठ बोलाएका छन् । काँग्रेसका शीर्ष नेता देउवा निवास पुगिसकेका छन् ।

काँग्रेस महामन्त्री पूर्णबहादुर खड्काले आफू देउवा निवास जान लागेको जानकारी दिए । पार्टीका नेताहरूसँगको आन्तरिक छलफलपछि देउवाले विपक्षी गठबन्धनका नेताहरूसँग आजै छलफल गर्ने खड्काले बताए ।

सर्वोच्च दुई दिनभित्र देउवालाई प्रधानमन्त्रीमा नियुक्त गर्ने परमादेश दिएकाले नयाँ सरकार निर्माणका सन्दर्भमा छलफल गर्न लागिएको बुझिएको छ ।