५८ दिनपछिको उडान : पहिलो दिनमै ९० प्रतिशत सीट भरियो

काठमाडौं । ५८ दिनपछि शुरु भएको उडानको पहिलो दिन नै सकारात्मक सन्देश गएको छ । कोरोना महामारीपछि निषेध भएको आन्तरिक हवाई उडान बिहीबारबाट सूचारु भएको हो ।  पहिलो दिन ९० प्रतिशत भन्दामाथि सिट भरेर जहाज उडेको कम्पनीहरुले जनाएका छन् ।

बुध्द एयरका सेल्स एण्ड मार्केटिङ निर्देशक रुपेश जोशीका अनुसार आज पहिलो दिन कम्पनीमा ३५ सय बुकिङ भएको छ । यति एयरलाइन्सका प्रवक्ता सुदर्शन बर्तौलाका अनुसार यतिका जहाजमा समेत ९० प्रतिशत भन्दा माथिको औसतः अक्कुपेन्सी देखिएको छ ।

सिमरा, विराटनगर, भद्रपुरजस्ता विमानस्थलबाट काठमाडौं आउने जहाजहरुको सिट भरिभराउ थियो । तर, काठमाडौंबाट बाहिरिने जहाजमा भने केही कम यात्रु थिए । औसतःमा ९० प्रतिशत यात्रु भरिएको उनले जानकारी दिए । लामो समयपछि खुलेको हवाई यात्रा सार्वजनिक बसको तुलनामा सुरक्षित हुने भएकाले समेत यात्रुको आकर्षण देखिएको छ ।