पार्टीलाई एकताबद्ध राख्ने भन्दै पुनः छलफलमा जुटे ओली र नेपाल समुहका दोश्रो तहका नेताहरु, ललितपुरमा बैठक जारी

काठमाडौं । विभाजन उन्मुख पुगेका नेकपा एमालेका ओली र माधव समुहका नेताहरु पुनः पार्टी एकताका लागि छलफलमा जुटेका छन् । दुवै समुहका दोश्रो तहका नेताहरु ललितपुरस्थित एक होटलमा आज बिहान ८ बजेदेखि  छलफलमा जुटेका हुन् । 

प्रधानमन्त्री एवं पार्टी अध्यक्ष केपी ओलीले बुधबार एमालेको दशौं महाधिवेशन आयोजक कमिटीको बैठक बसि पार्टीलाई २०७५ जेठ २ को अवस्थामा फर्काउने निर्णय गरेसँगै दोश्रो तहका नेताहरु छलफलमा जुटेका हुन् ।

उनीहरु यस अघि हिजो पनि छलफलमा जुटेका थिए । श्रोतका अनुसार ओली समूहका तर्फबाट सुवास नेम्वाङ, बिष्णु पौडेल र  शंकर पोखरेल सहभागी छन् भने खनाल नेपाल समूहबाट  घनश्याम भुसाल, गोकर्ण बिष्ट, भीम आचार्य र सुरेन्द्र पाण्डे छन्।

नेताहरुका अनुसार छलफल सकारात्मक भए पनि सहमतिको विन्दु फेला पर्न सकेको छैन् ।  दशौं महाधिवेशन आयोजक कमिटि नै अवैध रहेकाले त्यसले गरेको निर्णय अवैध भएको भन्दै खनालनेपाल समूहका नेताहरूले भने बुधबारको निर्णय जाली र षडयन्त्रपूर्ण भएकोले आफुहरुलाई मान्य नहुने धारणा सार्वजनिक गरिसकेका छन् ।