एमाले एकताको लागि माधव नेपाल पक्षको यी छ बुँदे बटमलाइन

काठमाडौं । नेकपा एमालेबाट निष्कासनमा परेका माधव नेपाल पक्षले पार्टी एकताको लागि ६ बुँदे बटमलाइन अघि सारेको छ । नेपाल पक्षीय केन्द्रीय सदस्यहरुको बैठकले निकालेका ६ बँदे बटमलाइनलाई स्थायी कमिटीको छलफलपछि आजै अन्तिम रुप दिन माधव नेपाल पक्ष लागिरहेका छन् । 

माधव नेपाल पक्षको स्थायी कमिटीले छलफलमार्फत ६ बुँदे बटमलाइनलाई सार्वजनिक गर्नेछ । यतिबेला माधव नेपाल पक्षको बैठक चलिरहेको छ । 
ओलीसँग संघर्ष चलिरहेको र त्यसले एकतामा बदलेमा र केपी ओली रुपान्तरण हुन चाहेमा एकता हुने नत्र निषेधको नीति लिएर विद्रोह गर्नुपर्ने नेपाल पक्षले निष्कर्ष लिएको छ ।

माधव नेपाल पक्षको यी ६ बुँदे बटमलाइन हुन्–

१) माधव नेपाल र झलनाथ खनालसहितको ११ जना नेताको निष्कासनको कारबाही फिर्ता गर्नुपर्ने । 

२) पार्टीका सबै संरचनालाई २०७५ जेठ २ गतेको अवस्थामा फर्काउने ।

३) जेठ २ अघिको स्थायी कमिटी बैठक बस्नुपर्ने ।

४) तल्ला कमिटीहरुको समायोजनका लागि कार्यदल बनाउने ।

५) ओलीले नवौं महाधिवेशनको निर्णय र नीति मान्ने र सामुहिक निर्णयका आधारमा चल्ने प्रतिबद्धता जनाउनुपर्ने ।

६) प्रतिनिसभा विघटन गलत कदम भनेर स्वीकार गर्नुपर्ने ।