भारतमा मृत्यु हुनेको संख्या अहिले सम्मकै सर्वाधिक, २४ घंटाको अन्तरालमा ४ हजार २ सय बढीले ज्यान गुमाए

एजेन्सी । कोरोनाको हटस्पट बनेको भारतमा पछिल्लो २४ घण्टामा  संक्रमणका कारण हालसम्मकै धेरै मानिसले ज्यान गुमाएका छन् ।  मंगलबार एकैदिन चार हजार २०५ कोरोना संक्रमितको मृत्यु भएको भारतीय संचारमाध्यमहरुले उल्लेख गरेका छन् । 

यसअघि, मंगलबारको तथ्यांकानुसार एकैदिन ४ हजार १८७ जनाको संक्रमणका कारण मृत्यु भएको थियो । भारतमा हालसम्म कोरोनाभाइरस संक्रमणबाट ज्यान गुमाउनेको संख्या २ लाख ५४ हजार १९७ पुगेको छ । त्यसमध्ये करिब ५० हजार मृत्यु पछिल्लो १४ दिनमा मात्र भएको जनाइएको छ ।

मृतकको संख्या बढिरहँदा दैनिक संक्रमितको संख्या भने ओरालो लागेको छ । पछिल्लो २४ घण्टामा तीन लाख ४८ हजार ४२१ नयाँ संक्रमित थपिएका छन् । यसअघि, दैनिक चार लाख बढीमा कोरोनाभाइरस संक्रमण हुँदै आएको थियो । भारतमा हालसम्म संक्रमितको संख्या दुई करोड ३३ लाख ४० हजार ९३८ पुगेको छ ।