ओलीलाई विश्वासको मत नदिनु आफूहरुको देश, जनता र पार्टीप्रतिको निष्ठाको द्योतक : माधव नेपाल (विज्ञप्ति सहित)

काठमाडौं । नेकपा (एमाले) का वरिष्ठ नेता माधव नेपालले प्रधानमन्त्री केपी ओलीलाई विश्वासको मत नदिनु आफूहरुको देश, जनता र पार्टीप्रतिको निष्ठाको द्योतक भएको बताएका छन् ।

सोमबार साँझ प्रेस विज्ञिप्त जारी गर्दै ओलीका गलत क्रियाकलापहरुको विरोध र प्रतिवाद गर्दै देश, जनता र लोकतन्त्रको भविष्य सुरक्षित गर्न आफूहरुले विश्वासको मत नदिने र प्रतिनिधि सभाको बैठकमा अनुपस्थित हुने निर्णय गरेको बताएका छन् ।

नेपाल समूहका दुई दर्जन बढी सांसदले ओलीलाई सोमबार विश्वासको मत दिएका थिएनन् भने विश्वासको मत नपाएपछि ओली सरकार स्वतः पदमुक्त बनेको छ । यस्तो अवस्थामा साँझ एक विज्ञप्ति जारी गर्दै उनले भनेका छन्, ‘उहाँका गलत क्रियाकलापहरूको विरोध र प्रतिवाद गर्दै देश, जनता र लोकतन्त्रको भविष्य सुरक्षित गर्नको लागि आ–आफ्नो स्थानबाट योगदान गर्नु सबै देशभक्त, लोकतन्त्र प्रेमी राजनीतिकर्मी तथा जनसमुदायको कर्तब्य  हुने भएकोले सोही अनुरुप हामीले प्रधानमन्त्री केपी ओलीलाई विश्वासको मत नदिने र प्रतिनिधि सभाको बैठकमा अनुपस्थित हुने निर्णय गरेका हौं । यो निर्णय हाम्रो देश, जनता र पार्टीप्रतिको निष्‍ठाको द्योतक हो ।’