प्रधानमन्त्री ओलीले गणतन्त्र नै धरापमा पार्ने गरि चलखेल गर्दापनि किन निरिह बनिरहेको छ काँग्रेस ?

काठमाडौं । नेपाली काँग्रेसले पछिल्लोे तीन वर्षदेखि प्रमुख प्रतिपक्षको भूमिका समेत निर्वाह गर्न नसकेको तथ्य कोही कसैबाट छिपेको छैन । प्रधानमन्त्री केपी ओलीले जे जस्ता मनलाग्दी हर्कत गरेपनि किन सिमित स्वार्थका पछाडि काँग्रेस लागिपरेको छ । यसको विष्लेशन काँग्रेसकै आम कार्यकर्ताले गर्न थालेका छन् । आफ्नो पार्टीको अस्तित्व नै लोकतन्त्र, गणतन्त्र भएको दुहाई दिन काँग्रेसका पदाधिकारी किन यतिबेला चुप लागेर बसेका छन् । 

जनताको जनजिवीकाको पक्षमा काँग्रेसले जबरजस्त आफना एजेण्डा स्थापित गराउन सक्थ्यो । जनतालाई केन्द्रमा राखेर सबै प्रकारका राजनीतिक एजेण्डा समेत अगाडि बढाउन सक्थ्यो । जनतालाई विश्वासमा लिन के कसो गर्नुपर्ने हो काँग्रेसका तर्फबाट हुनुपर्ने थियो । तर, काँग्रेसले कुनै पनि प्रयास गर्न सकेन । काँग्रेसलाई एकाध थान राजदूत, एकाध स्थानमा राजनीतिक नियुक्ति दिलाइदिन भन्दै  सभापति नै आएपछि ओलीलाई पनि हाइसन्चो नै भएको छ । किनकी धुत्याईमा सिपालु रहेका ओलीले काँग्रेसलाई आश्वासनकै भरमा प्रतिगमनको खास मस्कद पूरा गरेका हुन् । पछिल्लो पटक काँग्रेस ओली सरकार विरुद्ध अविश्वासको प्रस्ताव ल्याउने तयारी गरेको छ । सो सम्बन्धी निर्णय समेत केन्द्रीय समितिबाट गराएको छ । 

प्रमुख प्रतिपक्षी भनेकै खासमा प्रतिक्षारत सरकार हो । काँग्रेसले जनताका हरेक विषयमा आफूलाई अपडेट गरेर अगाडि जानुपर्ने थियो । तर, आफ्नो राजदूत नहटाइदिन आग्रह गर्दै बालुवाटार जाने प्रवृत्ति, एकाध जनालाई केही संवैधानिक नियुक्ति गराउने भन्ने सभापतिको व्यवहारका कारण ओलीले कोही कसैलाई पनि टेर्नुपर्छ भन्ने मान्यता राख्न छाडेका छन् ।  काँग्रेस भित्र पनि परिवर्तनको महान प्रक्रियामा सहभागी हुने योद्धाहरु छन् । बौद्धिक एवम् प्राविधिक क्षेत्रका  आम जानकार पनि छन् । उनीहरुलाई अगाडि सारेर जनताको पक्षमा माहोल बनाउने तथा आन्दोलित गर्ने दायित्वबाट काँग्रेस विमुख भएको छ । 

ओलीको ज्यादतीविरुद्ध लड्न पनि सोही प्रकारको नैतिक बल चाहिन्छ । नैतिक बल त्यस्तो शक्ति हो, जसले ठूला ठूला तानाशाह भनिएकालाई समेत घोडाबाट झार्ने ल्याकत राख्दछ । काँग्रेसले त्यस्तो खालको ल्याकत राख्नेतर्फ कुनै प्रयास नै गर्न सकेको छैन । सधै अनिश्चियको भुमरीमा फस्ने, कुनै योजना तथा कार्यक्रमविहिन अवस्थामा काँग्रेस रहेको छ । राजनीतिक रुपमा कुनै पनि कार्यसूचीका आधारमा मात्रै पार्टी चल्छ । काँग्रेसमा त्यस्तो खालको कुनै पनि कार्यसूची भएको देखिदैन । किनकी सभापति शेरबहादुर देउवालाई कुनै पनि मतदाताको पक्षमा काम गर्नु नै छैन । उनलाई आफना मानिसहरु जोगाउनुछ । पार्टी भन्दा पनि आफनो समूह जोगाउनु छ । सोही कारण काँग्रेस सरकार विरुद्ध आक्रामक रुपमा अगाडि बढ्न सकेको छैन ।

पार्टी नेतृत्वमा रहेको दिशाहिनता, अर्कमण्यता तथा तदर्थवादका कारण पनि मुलुकको राजनीतिले कोल्टे फेर्न सकेको छैन । विगतमा माओवादीसँग शान्ति सम्झौता गर्ने काँग्रेस नै थियो । संविधान निर्माण प्रक्रियाको नेतृत्व गर्ने समेत काँग्रेस नै थियो । तर, आज राजनीतिमा पर फालिएको कुनै काम नलाग्ने वस्तु जस्तो गरी संविधान समेत कुल्चिदा काँग्रेस केवल प्रतिक्रियामा रमाएको छ । कुनै पनि ठोस निर्णय गर्न नसक्ने गतिहिनि अवस्थामा काँग्रेस किन पुग्यो भन्ने चिन्ता र चासो आम जनमानसमा देखिएको छ । 

विशेष गरी भारतीय खुफिया एजेन्सीको कालो छाँयाका काँग्रेसको घरभित्र परेको छ । सोही कारण उसले कुनै पनि राजनीतिक मुद्दामा नेतृत्व गर्न सक्दैन । विशेषतः पछिल्ला दिनमा ओली र बालुवाटारले काँग्रेस सभापति शेरबहादुर देउवा पत्नी आरजू राणालाई २ अर्ब बढी रकमको स्रोत नखुलेको भन्दै सम्पत्ति शुसिद्धकरण विभागले कारवाहीको तयारी गरेको भन्ने हल्ला चलाइएको छ । सम्पत्ति शुद्धिकरण विभाग प्रधानमन्त्री तथा मन्त्रिपरिषद्को कार्यालय मातहत रहेको छ । विजयकुमार गच्छदार जो उपसभापति थिए । उनी ललिता निवास प्रकरणमा मुछिएका छन् । उनलाई पक्राउ गर्ने तयारीमा सरकार रहेको छ ।

भ्रष्टाचारको मुद्दामा गच्छदारलाई फसाएर काँग्रेसलाई थ्रेट गर्ने योजनामा बालुवाटार रहेको छ । सोही कारण पनि प्रष्ट निर्णय गर्न काँग्रेस डराएको छ । किनकी काँग्रेस भित्र कुै पनि प्रकारको नैतिक धरातल रहेको छैन । प्राय जसो नेता तथा कार्यकर्ता अनियमित काममा जोडिएका छन् । प्रजातान्त्रिक मूल्य तथा मान्यता समेत भेटन मुस्किल रहेको छ । अराजकताको घरको रुपमा काँग्रेस परिचित छ र स्थापित छ भन्दा कुनै गुनासो गर्नुपर्ने ठाँउ नै छैन । 

काँग्रेस यसरी तर्दथवादमा रहन सक्दैन भन्दै युवा नेताहरु गगन कुमार थापा, विश्वप्रकाश शर्मा, धनराज गुरुङहरुले पटक पटक सार्वजनिक मञ्चमार्फत आफनो धारणा सार्वजनिक गर्दै आएका छन् । तर, उनीहरुको भनाईलाई पार्टी नेतृत्वले कुनै पनि सुनुवाई गरेको छैन । किनकी, नयाँ विचार, कार्यक्रम, योजना, कार्यसूची तयार कसले कसरी गर्ने हो  भन्नेमा नेतृत्व नै दुविधामा रहेको छ । 

पूरानो पुस्ताबाट न त काँग्रेस अगाडि जानसक्छ , न त कुनै पनि राजनीतिक आन्दोनको लक्ष्य पूरा हुन सक्छ । त्यसकारण पनि खुफिया एजेन्सीको  उम्मेदवार होइन, खास अर्थमा जनताको सेवकका रुपमा काँग्रेस पुनः एकपटक जागृह भएर मैदानमा खडा हुनु जरुरी छ । अन्यथा, प्रतिगमनले सबै आन्दोलनबाट स्थापित गरेको मूल्य तथा मान्यतालाई खारेज गर्ने निश्चित छ ।