माओवादी केन्द्रबाट एमालेमा प्रवेश गरेका चार नेताको मन्त्री पद खुस्कियो

काठमाडौं । नेकपा माओवादी केन्द्र परित्याग गरी नेकपा एमाले प्रवेश गरेका चार नेताका मन्त्री पद खुस्किएको छ । माओवादी केन्द्रबाट एमालेमा प्रवेश गरेका टोपबहादुर रायमाझी, लेखराज भट्ट, प्रभु साह र गौरीशंकर चौधरीको मन्त्री पद फुस्केको छ । 

उनीहरुको सांसद पद गएसँगै चारै जनाको मन्त्री पद पनि गएको छ । भट्ट ५ मंसिर २०७६ मा उद्योग, वाणिज्य तथा आपूर्तिमन्त्री बनेका थिए  भने रायमाझी, साह र चौधरी १० पुस २०७७ मा मन्त्री बनेका थिए । रायमाझी ऊर्जा, जलस्रोत तथा सिञ्चाइ, साह शहरी विकास र चौधरी श्रम, रोजगार तथा सामाजिक सुरक्षामन्त्री थिए । उनीहरु संविधानको धारा ७६ (९) अनुसार मन्त्री नियुक्त भएका थिए । 

सांसद नरहेपछि उनीहरु स्वतः मन्त्री पदबाट पदमुक्त भएका हुन् । एमाले संसदीय दलका उपनेता सुवास नेम्वाङका अनुसारसांसद पद नै नरहेपछि मन्त्री पद रहने कुरै आउँदैन । यद्यपि उनीहरुलाई पुनः मन्त्री नियुक्त गर्ने सम्भावना भने छ । ‘उहाँहरुले पार्टी एकताका लागि जुन योगदान गर्नुभएको छ, त्यसलाई हेर्दा प्रधानमन्त्रीले उहाँहरुलाई तुरुन्तै पुनः मन्त्री नियुक्ति गर्नुहोला’ पूर्वसभामुखसमेत रहेका नेम्वाङले भने ।

बिहीबार प्रतिनिधिसभाको बैठकमा सभामुख अग्नि सापकोटाले निर्वाचित अर्घाखाँचीका टोपबहादुर रायमाझी, कैलाली–४ का लेखराज भट्ट, रौतहट–३ का प्रभु साह र कैलाली–३ का गौरीशंकर चौधरीको सांसद पद रिक्त भएको जानकारी गराएका थिए ।