एमालेको खनाल-नेपाल समूहको केन्द्रीय कमिटी बैठक आज पुनः बस्दै

काठमाडौं । नेकपा एमालेको झलनाथ खनाल र माधव नेपाल पक्षको केन्द्रीय कमिटी बैठक बस्दैछ । बिहान ११ बजे बस्ने भने पनि बैठक केही ढिलो गरी सुरु हुने जनाइएको छ । उक्त पक्षमा नेता रघुजी पन्तका अनुसार शुक्रबारको संसदीय दलको बैठकबारे नेताहरुले केन्द्रीय सदस्यलाई ब्रिफिङ गर्ने छन् ।

उनले भने, ‘हिजो संसदीय दलको बैठकमा सहभागी हुनुभएका नेताहरुले त्यहाँ भएको गतिविधिबारे केन्द्रीय सदस्यलाई जानकारी दिनुहुन्छ । साथै अब कसरी अगाडि बढ्ने भन्ने विषयमा पनि परामर्श गर्छौं ।’ आजको छलफल हिजोका छलफल कै निरन्तरता भएको उनको भनाइ छ ।

शुक्रबार पनि कलंकीस्थित एक प्यालेसमा खनाल-नेपाल पक्षका केन्द्रीय सदस्य र सांसदहरुबीच छलफल भएको थियो । सोही छलफलपछि नेता खनालको नेतृत्वमा नेपाल र भीम रावलबाहेकका सांसदहरु प्रधानमन्त्रीको सरकारी निवास बालुवाटारमा बसेको सांसद संसदीय दलको बैठकमा सहभागी भएका थिए । 

सर्वोच्चले २३ फागुनमा नेकपा खारेज गरी साविकको एमालेमा र माओवादी ब्युँत्याएपछि एमालेमा अध्यक्ष ओली र खनाल र नेपाल समूहबीचको विवाद उत्कर्षमा छ ।

ओलीले एमाले ब्यूँतिँदा पनि एकलौटी निर्णय लिएपछि खनाल–नेपाल पक्षले पार्टीभित्र समानान्तर गतिविधि अगाडि बढाएको छ । खनाल–नेपाल पक्षले केन्द्रीय नेतृत्व बाहेक पार्टी तथा भ्रातृ संगठनमा समानान्तर कमिटी निर्माण गरेको छ ।

पार्टीका एकता जोगाउन ०७५ जेष्ठ २ कै पार्टी संरचनामा जानुपर्ने खनाल नेपाल पक्षको अडान छ । अध्यक्ष ओलीले भने संसद विघटनपछि तत्कालीन ९नेकपा० हुँदा नै आफूले बनाएका कमिटीलाई एमालेको पार्टी कमिटीमा रुपान्तरण गरेका छन् ।

साथै फागुन २८ गते आफू पक्षीय केन्द्रीय कमिटी बैठक बोलाएर गरिएका गरिएका निर्णय पनि फिर्ता नलिने अडानमा छन् । ओलीले नेता नेपाल, रावल, सुरेन्द्र पाण्डे र घनश्याम भुसालमाथि कारबाहीको तयारी थालेका छन् ।

नेपाल र रावलले पार्टीलाई बुझाएको प्रष्टीकरण कारबाही योग्य भएको ओलीले बताइसकेका छन् । आजको छलफलमा ओलीले कारबाही गरेको खण्डमा कसरी जाने भन्नेबारे पनि विमर्श हुने पन्तले बताए ।

हिजोकै स्थानमा बैठक बस्ने र अहिले त्यहाँ गइरहेको केन्द्रीय सदस्य ठाकुर गैरेले जानकारी दिए ।