कांग्रेस संसद् पुनःस्थापना र निर्वाचन दुवैका लागि तयार : सभापति देउवा

काठमाडौँ । नेपाली काँग्रेसका सभापति शेरबहादुर देउवाले कांग्रेस संसद् पुनःस्थापना र निर्वाचन दुवैका लागि तयार भएको बताएका छन् प्रतिनिधि सभा विघट्नको विषय सर्वोच्च अदालतमा विचाराधीन रहेको अवस्थामा जुलुसमा नारा लगाएर अदालतलाई प्रभाव नपार्ने उनको भनाइ थियो । 

पार्टीको आदिवासी जनजाति केन्द्रीय विभागले आज यहाँ आयोजना गरेको कार्यक्रममा देउवाले भने, ‘काँग्रेस निर्वाचनमा विश्वास गर्ने लोकतान्त्रिक पार्टी हो, संसद् पुनःस्थापना र निर्वाचन दुवैका लागि तयार हुनुपर्छ ।’ उनले दुई वर्षपछि भए पनि अहिले भए पनि मुलुकमा निर्वाचन हुने बताए । 

कार्यक्रममा पार्टी उपभापति विमलेन्द्र निधिले सरकारले प्रतिनिधिसभा विघटन गरेको कार्यविरुद्ध वडास्तरसम्म राष्ट्रव्यापी कार्यक्रम गरेको बताए । उनले संविधानको व्यवस्थाविपरीत खोसिएको प्रतिनिधिसभा पुनःप्राप्ति हुनुपर्ने उल्लेख गर्दै त्यसका लागि संसद् पुनःस्थापना र निर्वाचन दुई बाटो रहेको बताए । आफूहरु स्वतन्त्र न्यायपालिकाको पक्षमा रहेकाले अदालतमा विचाराधीन रहेको विषयलाई प्रभाव पर्ने गरी नबोल्ने स्पष्ट पार्दै  काँग्रेस संसद् पुनःस्थापना र निर्वाचन दुवैका लागि तयार भएको बताए । 

सहमहामन्त्री डा प्रकाशशरण महतले प्रतिनिधिसभा विघटन भएको अवस्थामा संसद् चाँडै आउनुपर्ने बताउँदै भने, ‘चाहे पुनःस्थापना होस्, चाहे निर्वाचनबाट आओस्, त्यसका लागि अदालतले छिटो निर्णय गर्नुपर्छ ।’