प्रचण्डको प्रस्तावलाई सूर्य थापाले भने–भ्रमको पुलिन्दा

काठमाडौ । सत्तारुढ दल नेकपामा नेताहरुले शुक्रबार बसेको सचिवालय बैठकमा अध्यक्ष पुष्पकमल दाहाल प्रचण्डले राखेको प्रस्तावलाई लिएर अनेकौ टीकाटिप्पणी गर्न थालेका छन् । 

अध्यक्ष प्रचण्डले पार्टी सचिवालयमा पेश गरेको प्रस्ताव प्रधानमन्त्रीका प्रेस सल्लाहकार सूर्य थापाले भ्रमको पुलिन्दा भनेका छन् । प्रचण्डले उक्त प्रस्ताव फिर्ता नगरेसम्म कुनै तहको छलफल र बैठक नै नबस्ने उनले चेतावनी दिएका छन् । 

थापाले शनिबार फेसबुकमा लेखेका छन्, ‘एकल रूपमा मनोमानीपूर्ण ढंगले बाँडेको अराजनीतिक प्रस्ताव स्वयंमा अनधिकृत, गैरजिम्मेवार, अनैतिक, भ्रमको पुलिन्दा र तथ्यको नांगो भ्रष्ट्रीकरण हो ।’, 

उनले थप भनेका छन्, ‘यस्तो लाञ्छनापत्रमाथि कमसेकम पार्टी कमिटीहरूमा छलफल हुनसक्दैन । पार्टी विधान, परम्परा, अभ्यास र दुबैजना अध्यक्षको सहमतिमा मात्रै कुनै पनि प्रस्ताव तयार भएर प्रस्तुत हुने पछिल्लो स्थायी समिति बैठकले समेत गरेको निर्णयको यो ठाडो उल्लंघन हो ।’