४ महिना पछि नेपालबाट मनसुन बाहिरियो

काठमाडौँ । नेपालबाट मनसुन बाहिरिएको छ ।  गएको जेठ ३० गते पूर्वबाट नेपाल भित्रिएको मनसुन शुक्रबार (अशोज ३० गते) बाहिरिएको जल तथा मौसम पूर्वानुमान महाशाखाले जनाएको छ ।

औषत भन्दा बढी वर्षा भएको यो वर्ष प्रि–मनसुनदेखि नै लगातार जस्तो वर्षा भएको थियो । मनसुन भित्रिएयता लगातारजस्तो सक्रिय रहँदा यो वर्ष औषत भन्दा बढी वर्षा भएको मौसमविदको भनाई छ । 

मनसुन अवधिमा कति वर्षा भयो भन्ने विस्तृत विवरण संकलनको काम भइरहेको महाशाखाले जनाएको छ । गएको जेठ ३० गते नेपालको पूर्वी भू–भागबाट प्रवेश गरेको यस वर्षको मनसुन सुदूरपश्चिम प्रदेश, कर्णाली प्रदेश र प्रदेश ५ को पश्चिमका केही भू–भागबाट अशोज १५ गते नै बहिर्गमन भएको थियो । असोज ३० गते शुक्रबार अर्थात भित्रिएको ठ्याक्कै चार महिनापछि देशको सम्पूर्ण भू–भागवाट यस वर्षको मनसुन बाहिरिएको हो ।