अविरल वर्षासंगै नारायणी नदीले खतराको तह पार गर्यो, स्थानिय प्रशासनद्धारा सतर्कता अपनाउन आग्रह

चितवन । अविरलको वर्षासँगै चितवन स्थित नारायणी नदीमा पानीको सतहले खतराको तह पार गरेको छ । बुधबार देखि लगातार परेको वर्षा पछि नारायणीमा पानीको बहाब बढ्दै गएको हो ।

देवघाट क्षेत्रमा रहेको जलमापन केन्द्रमा नदीको सतहले खतराको तह पार गरिसकेको छ भने नारायणगढ क्षेत्रमा सतर्कताको तह पार गर्दै खतराको तहतर्फ उन्मुख भएको जल तथा मौसम विज्ञान विभागले जनाएको छ ।

देवघाट क्षेत्रमा पानीको सतह ८.३ मिटरमा पुगेको छ। यो क्षेत्रमा ७.३ मिटरलाई सतर्कता तह र ८ मिटर पुगेमा खतराको तह मानिन्छ । नारायणगढको पुल्चोकस्थित नारायणी नदीको पुलमा पानीको सहत ११.३ मिटर पुगेको छ। ११ मिटरलाई सतर्कताको तह मानिएपनि अहिले खतरा तह पार गरिरहेको छ । 

निरन्तर वर्षासँगै बाढीको संभावना रहेकाले नदी तटीय क्षेत्रमा बसोबास गर्नेहरूलाई चितवन प्रशासनले सतर्क रहन अनुरोध गरेको छ।