भारतको केरलमा विमान दुर्घटना, २ पाईलट सहित १७ जनाको निधन

नयाँदिल्ली । एयर इन्डियाको विमान केरलको कालिकट विमानस्थलमा शुक्रबार साँझ दुर्घटनाग्रस्त भएको छ । दुबईबाट आएको एयर इन्डियाको आईएक्स १३४४ बोइङ ७३७ विमान अवतरणका क्रममा दुर्घटनाग्रस्त भएको हो ।

दुर्घटनामा परी दुई जना पाइलटसहित कम्तीमा १७ जनाको मृत्यु भएको भारतीय सञ्‍चारमाध्यम जनाएको छ । त्यस्तै कम्तीमा ५० जना घाइते भएको र तीमध्ये २५ जनाको अवस्था गम्भीर रहेको बताइएको छ ।

तर विमान कम्पनीले भने यसको आधिकारिक पुष्टि गरेको छैन । एयर इन्डियाले दुर्घटनामा थुप्रै यात्रु घाइते भएको र उनीहरुको उद्धार भइरहेको जनाएको छ । विमान धावनमार्गबाट चिप्लिएर ठोक्किँदा दुई टुक्रा भएको भारतीय सञ्चारमाध्यमले बताएका छन् ।

विमान दुई टुक्रा भए पनि आगलागी भने नभएको कम्पनीले जनाएको छ ।भारतीय सञ्चारमाध्यमका अनुसार विमानमा चालक दलका सदस्यसहित १९१ जना सवार थिए ।