काठमाडौं । विश्वभर कोरोना (कोभिड–१९) भाइरसको महामारी फैलिरहेका बेला सुरक्षा निकायहरु आफैले पीसीआर परीक्षण गर्ने तयारी थालेका छन् । सुरक्षाकर्मीमा संक्रमितको संख्या बढ्दै जाँदा आफैले पीसीआर मेसिन खरिद गरेर कोरोना परीक्षण गर्ने तयारी थालेका हुन् ।
कोरोना सङ्क्रमको बेला फ्रन्ट लाइनमा खटिएका नेपाली सेना, नेपाल प्रहरी र सशस्त्र प्रहरी बलले पीसीआर मेसिन जडान गर्ने प्रक्रिया अघि बढाएका छन् । सेनाले सैनिक अस्पताल, छाउनीमा राख्ने गरी पीसीआर मेसिन खरिदका लागि टेण्डर खुलाएको छ । सशस्त्र प्रहरीले पनि मेसिन खरिदका लागि टेण्डर खुलाएको सशस्त्र प्रहरी अस्पतालका डीएसपी डा. प्रविण नेपालले जानकारी दिए । त्यस्तै, नेपाल प्रहरी अस्पतालमा पनि बुधबार पीसीआर मेसिन राखिएको छ ।
नेपाल प्रहरी अस्पतालका प्रहरी वरिष्ठ उपरीक्षक (एसएसपी) सञ्जय श्रेष्ठले केही प्राविधिक पक्ष मिलाउन बाँकी रहेको भन्दै केही दिनपछि पूर्ण रुपमा सञ्चालनमा आउने बताए ।
आरोपीको म्याद थप्दा पीसीआर रिपोर्ट अनिवार्य
काठमाडौँको महानगरीय अपराध अनुसन्धान महाशाखाका प्रमुख प्रहरी वरिष्ठ उपरीक्षक (एसएसपी) दीपक थापाका अनुसार असार ८ गते जिल्ला अदालत, काठमाडौंले पीसीआर रिपोर्ट नल्याएको भन्दै विद्युतीय कारोबार सम्बन्धी ऐनका एक अभियुक्तलाई फिर्ता गरिदिएको थियो ।
थापाले भने, ‘अदालतले अभियुक्तसँगै रहने सुरक्षाकर्मीको पनि पीसीआर जाँच्न भनेको थियो ।’ तर, प्रहरी अधिकृतलाई टेकुस्थित राष्ट्रिय जनस्वास्थ्य प्रयोगशालामा पठाउँदा प्रहरीकहाँ नै जाँच्ने भन्दै फर्काइयो ।
‘पहिले प्रयोगशालामा पठाउँदा प्रहरीले नै जाँच्छ भनेर फर्काइएको थियो, प्रहरी अस्पतालमा अहिले पसीआर उपकरण जडान भएको छ’, थापाले भने, ‘हाल प्रहरी अस्पतालमै स्वाब संकलन गरेर प्रयोगशाला पठाउने गरिएको छ ।’
मिसनमा जान पनि पीसीआर रिपोर्ट
नेपाली सेनाका एक हजार सैनिक अधिकारी संयुक्त राष्ट्रसंघको शान्ति मिसनमा जाँदैछन् । महामारीका कारण तीन महिना रोकिएको बदली पुनः सुरु भएसँगै उनीहरुलाई पाँच खालस्थित वीरेन्द्र शान्ति कार्य तालिम केन्द्रको क्वारेन्टिनमा राखिएको छ ।
यूएनले उनीहरुको पीसीआर रिपोर्ट अनिवार्य पठाउन भनेको छ । त्यसैले जाँचका लागि सेनाले पनि आफैं पीसीआर मेसिन खरिद गर्न लागेको सैनिक प्रवक्ता विज्ञानदेव पाण्डेले बताए । ‘एकपटकको टेण्डर रद्द भएको छ र दोस्रो पटक फेरि टेण्डर खुलाउँदैछौं’, उनले भने, ‘यो सैनिक अस्पतालमा राखिनेछ ।’
सेनाले विदामा गएका सैनिकहरुलाई पनि पीसीआर परीक्षण गरेर मात्र ब्यारेकमा राख्ने गरेको छ । त्यसैले पनि पीसीआर मेसिन सैनिक अस्पतालमा राख्नु आवश्यक रहेको जंगीअड्डाका अधिकारीहरुको भनाइ छ । सरकारले दैनिक पीसीआर जाँचलाई बढाउँदै लैजाने तयारी स्वरुप सुरक्षा निकायलाई पनि पीसीआर जाँच गर्न दिने निर्णय गरेको थियो ।
सशस्त्र प्रहरीले खरिद गर्न लागेको पीसीआर मेसिन बलम्बुस्थित कोभिड विशेष अस्पतालमा राखिनेछ । त्यहाँ सशस्त्र प्रहरीका अधिकारीहरुको जाँच हुनेछ । हालसम्म नेपाली सेनामा ५२ जना अधिकारीमा कोभिड–१९ संक्रमण देखिएको छ भने २५ जना निको भइसकेका छन् । नेपाल प्रहरीका ८२ जना संक्रमित रहेको प्रवक्ता डीआईजी निरजबहादुर शाही बताउँछन् । सशस्त्र प्रहरीमा ४३ जना संक्रमित छन्, तीमध्ये २५ जना निको भइसकेको सशस्त्र प्रहरी प्रवक्ता प्रविणकुमार श्रेष्ठले बताए ।
प्रतिक्रिया दिनुहोस
सफल खबर संवाददाता
विहीबार, १८ असार २०७७, १३ : ३१
लेखकबाट थप
सम्बन्धित समाचारहरु
हावाबाट कोरोना फैलिएको विश्व स्वास्थ्य संगठनको स्विकारोक्ति
कोरोना भाइरसविरुद्धको खोप विसर्जन गरिँदै
नेपालमा कोभिडको नयाँ भेरियन्ट नभित्रिएको स्वास्थ्य मन्त्रालयको भनाइ
भारतको ११ राज्यमा फैलियो कोरोना भाइरसको नयाँ भेरियन्ट
भारतमा भेटियो कोरोनाको नयाँ भेरियन्ट
कोरोना भाइरसविरुद्धको ४० लाख मात्रा डोज खोप खेर जाँदै