कोरोनाका सबै बिरामी डिस्चार्ज भएपछि...

एजेन्सी । चीनबाट शुरु भएर विश्वभर फैलिएकोे कोरोना भाइरसको संक्रमण चीनमा कमी आएको छ । गएको डिसेम्बरबाट चीनबाट शुरु भएको यो रोगको संक्रमण दर चीनमा भने हत्तै घटेको छ । अन्य देशमा भने फैलिरहेको छ । 

चीनको वुहान अस्पतालका डाक्टर तथा नर्सहरुले अस्पतालको चाप र मानवीय समवेदनालाई विचार गर्दै दिनरात नभनी बिरामीको उपचारमा लागिपरे । कतिपय डाक्टर तथा नर्सहरुले उपचारकै क्रममा संक्रमित भएर ज्यान समेत गुमाए । तर अब चीनले केही राहतको महसुस गरेको छ । कोरोनाका बिरामीको संख्या चीनमा नगन्यमा झरेको छ । 

यसैबीच सोशल मिडियामा अहिले एक तस्वीर भाइरल बनेको छ । तस्वीरमा वुहान अस्पतालमा कोरोना भाइरसका संक्रमित अन्तिम बिरामी डिस्चार्ज भएपछि एक डाक्टर लम्पसार परेर सुतिरहेका छन् । 

अन्तिम बिरामी समेत डिस्चार्ज भएपछि वुहान अस्पतालका डाक्टर शियाँल लाइन्ग राहत महसुश गर्दै बिरामी राख्ने बेडमै लमतन्न परेर सुतेका हुन्। यो तस्बिर यतिबेला भाइरल भइरहेको छ ।