सभापति देउवाद्वारा केन्द्रीय विभागहरुको प्रमुखमा थप मनोनयन

काठमाडौं । नेता रामचन्द्र पौडेल पक्षधरको विरोधबीच नेपाली कांग्रेसका सभापति शेरबहादुर देउवाले केन्द्रीय विभागहरुको प्रमुखमा थप मनोनयन गरेका  छन् । 

सभापति देउवाले सोमबार  कांग्रेसको विधान, २०१७ (संशोधन सहित) को धारा ३७ (१) (ग) बमोजिम थप ७  केन्द्रीय विभागहरुको प्रमुखमा मनोनयन गरेका हुन् । जसअनुसार  एनपी साउँदलाई शुभेच्छुक संस्था समन्वय विभागको जिम्मेवारी दिइएको छ भने अम्बिका बस्नेतलाई वन, वातावरण तथा विपत व्यवस्थापन विभागको जिम्मेदवारी दिइएको छ । 

यस्तै ईश्वरी न्यौपानेलाई महिला विभाग, केशवकुमार बुढाथोकीलाई राज्य प्रशासन विभाग,  मोहनबहादुर बस्नेतलाई खेलकूद विभाग, बीरबहादुर बलायरलाई निर्माण व्यवसायी समन्वय विभाग र  हरिप्रसाद नेपाललाई शिक्षा विभागको जिम्मेदवारी दिइएको छ । यसअघि शनिबार सभापति देउवाले विभिन्न १३ वटा विभाग गठन गरेका थिए ।