सन्दीप लामिछाने एक सय विकेट पूरा गर्ने पहिलो नेपाली

काठमाडौँ । नेपालका लेग स्पिनर सन्दीप लामिछानेले अन्तर्राष्ट्रिय टी–२० क्रिकेटमा एक सय विकेट पूरा गर्ने पहिलो नेपाली क्रिकेटर बनेका छन् । सन्दीपले थाइल्याण्डमा शनिबार देखि सुरु भएको एसीसी इस्टर्न रिजन टी–२० क्रिकेटमा विकेट लिंदै ऐतिहासिक उपलब्धि हात पारेका हुन् ।

यसअघि ९९ विकेट लिएका सन्दीपले मलेसियाविरुद्ध विकेट लिएपछि सय विकेटको आँकडा पूरा गरे । उनले मलेसियाविरुद्ध आज दुई विकेट लिए । सन्दीपले पहिलो ओभरको दोस्रो बलमा मलेसियाका भिरनदिप सिंहलाई र अर्को बलमा खिजार हायतलाई आउट गरेका थिए । यससँगै सन्दीपले टी–२० एक सय एक विकेट पूरा गरेका छन् ।

सन्दीपले नेपालको राष्ट्रिय टोलीबाट १८ खेल खेल्दै ३० विकेट लिएका छन् । बाँकी ७१ विकेट विभिन्न अन्तर्राष्ट्रिय फ्रेन्चाइज लिग खेलेर लिएका हुन् ।