महामन्त्री बन्न थापाले छाडे सिटौला गुट

काठमाडौँ । नेपाली काँग्रेसभित्र काम नगर्ने तर हल्ला गर्ने समूहका प्रमुख जस्तै छन् गगन थापा । उनी आफूलाई सेलिब्रेटी नेता भएको पनि ठान्छन् । युवा पुस्तामा लोकप्रिय भएपनि थापालाई नेपाली कांग्रेसभित्र अस्थिर नेताका रुपमा लिने गरिन्छ । जता मल्कु उतै ढल्कु थापाको विशेषता बनेको छ । व्यक्तिगत स्वार्थका लागि नेता कृष्णप्रसाद सिटौलाको फेरो पकडेर राजनीतिमा उदाएका थापाले अहिले आफूलाई नयाँ बाटोमा लगेको बताइन्छ । 

सिटौलामार्फत केन्द्रीय सदस्य र मन्त्री बन्न सफल भएका थापाले १४औँ महाविधेशनलाई निशाना बनाएका छन् । काठमाडौं क्षेत्र नम्बर ४ मा काम गर्न नसकेर अलोकप्रिय बन्दै गरेका थापाले १४ औँ महाधिवेशनमा महामन्त्रीमा उम्मेदवार बनेर एक पटक कांग्रेसभित्र हालिमुहाली गर्ने योजना बनाएको उनीहरु निकट बताउँछन् । उनले अहिलेदेखि नै महामन्त्रीको तयारी गरिरहेका छन् । महामन्त्री बन्ने सर्तमा उनले सिटौला समूहलाई छाड्ने तयारी गरेका हुन् । थापालाई अर्का युवा नेता प्रदीप पौडेलले साथ दिएका छन् । उनीहरू दुबै नेता प्रकाशमान सिंहको पछाडि लागेर १४औँ महाधिवेशनमा प्रतिस्पर्धा गर्ने योजना बनाइरहेको स्रोतको भनाइ छ । 

सिटौला समूहबाट महामन्त्री बन्ने सम्भावना निकै कम देखेका थापाले सिंहलाई नेता मानेर अगाडि बढ्ने तयारीमा रहेको बताइएको छ ।  सिंहलाई नेता मान्दै आएका नवीन्द्रराज जोशीले साथ छोड्ने संकेत दिएका छन् । 

थापा र पौडेल नेता सिंहलाई भेट्न चाक्सीबारीमा धेरै नै समय खर्च गर्ने गरेका छन् । काठमाडौं उपत्यकाको हकमा थापालाई सिंहकै पछाडि लाग्दा फाइदा हुन्छ भन्ने निष्कर्षमा पुगेका छन् । यसरी गुटगुट खर्च गरेर बाहिर जाने वा लैजाने प्रक्रियाले  पार्टी संगठनलाई कमजोर बनाएका छन् । सो खेलमा थापा सक्रिय रुपमा लागेका छन् ।