युएईमा नेपाली सवार बस दुर्घटना : पाँच जनाको मृत्यु, १९ जना घाइते

काठमाडौं । युएईको आबुधाबीमा कामदार बोकेको गाडी दुर्घटना भएको छ ।  दुर्घटनामा पाँच व्यक्तिको मृत्यु भएको छ भने १९ जना घाइते भएका छन् । 

बिहान साढे ५ बजे अल राहा सडकमा दुर्घटनामा परेको मिनिबसमा नेपालीहरु पनि सवार थिए । यूएईका लागि नेपाली राजदूत कृष्णप्रसाद ढकालले २४ जना सवार मिनीबसमा १८ जना नेपाली रहेको जानकारी आफूले पाएको बताएका छन् ।  अन्य ६ जना श्रीलंका र अफ्रिकी मुुलुकका महिला कामदार रहेको बताइएको छ । सवार सबै सरसफाइ सम्बन्धी काम एमबीएम कम्पनीका कामदार हुन् ।

मृतकहरुको पहिचान हुन नसकेको राजदूत ढकालले फेसबुकमार्फत जानकारी दिएका छन् । ढकालले भनेका छन्, ‘मृतक कुन मुलुकका हुन् भन्ने स्पष्ट भइसकेको छैन् ।’
उनका अनुसार नेपाली कामदारको अवस्था र विवरण संकलन गर्न दूतावासका प्रतिनिधि घाइतेको उपचार भइरहेको अस्पतालमा पुगेको छ ।
घाइतेहरुलाई माफराक अस्पतालमा उपचार भइरहेको छ ।