जनताको चाहना सम्बोधन गर्नेगरी बजेट ल्याइएको छ : सञ्चारमन्त्री तिमिल्सिना

काठमाडाैँ । सूचना तथा सञ्चारमन्त्री डा. विक्रम तिमिल्सिनाले निर्वाचनका क्रममा जनतासामु गरिएका प्रतिबद्धता कार्यान्वयन गर्न सरकार नतिजामुखी रूपमा दृढतापूर्वक काम गरिरहेको बताएका छन् ।

सत्तारुढ दल राष्ट्रिय स्वतन्त्र पार्टी (रास्वपा) को प्रथम पालिका अधिवेशनका अवसरमा तादी गाउँपालिका–५ मा शनिबार आयोजित कार्यक्रममा बाेल्दै उनले आगामी आर्थिक वर्ष २०८३/०८४ को बजेट सुशासन, समृद्धि र परिवर्तनको आकांक्षालाई सम्बोधन गर्नेगरी तयार गरिएको बताए ।

सञ्चारमन्त्री तिमिल्सिनाले बजेटले मुलुकको अर्थतन्त्रलाई आगामी दिनमा कुन दिशातर्फ अघि बढाउने भन्ने स्पष्ट मार्गचित्र प्रस्तुत गरेको उल्लेख गर्दै सरकारका प्राथमिकता, राजस्व नीति तथा दीर्घकालीन विकास दृष्टिकोणलाई समेटिएको बताए ।

नीतिगत सुधारमार्फत् विकास प्रक्रियालाई प्रभावकारी, सन्तुलित र समावेशी बनाउने प्रयास भइरहेको तथा समानुपातिक विकास सुनिश्चित गर्न सरकार प्रतिबद्ध रहेको उनको भनाइ थियो ।

उनले यसपटकको बजेट राष्ट्रिय आवश्यकतालाई केन्द्रमा राखेर विकासको स्पष्ट आधार तय गर्ने उद्देश्यसहित ल्याइएको दाबी गरे ।

विकास र समृद्धिको लाभ सीमित समूहमा केन्द्रित हुने अवस्थाको अन्त्य गरी सबै नागरिकलाई लाभ पुग्ने व्यवस्था गर्न सरकार प्रयासरत रहेको पनि उनले बताए ।