पुँजी बजार विस्तारका लागि पेन्सन कोष र गैरआवासीय नेपालीको सहभागिता बढाइने

संघीय संसद्को संयुक्त बैठकमा राष्ट्रपति रामचन्द्र पौडेलले आगामी आर्थिक वर्ष २०८३-८४ को नीति तथा कार्यक्रम प्रस्तुत गर्दै पुँजी बजारलाई अझ व्यापक र समावेशी बनाउने योजना सार्वजनिक गरेका हुन्। नीति तथा कार्यक्रममा संस्थागत लगानीकर्ताका रूपमा पेन्सन कोष, बीमा कम्पनी, म्युचुअल फन्ड तथा गैरआवासीय नेपालीको लगानी विस्तार गरिने उल्लेख छ। यसले पूँजी बजारमा दीर्घकालीन स्रोत परिचालन गर्ने अपेक्षा गरिएको छ।

त्यसैगरी बजारलाई सुरक्षित, प्रतिस्पर्धी तथा अन्तर्राष्ट्रिय मापदण्डअनुसार विकास गर्ने लक्ष्य सरकारले लिएको छ। धितोपत्र नियमन प्रणाली, नेपाल स्टक एक्सचेञ्ज (नेप्से) तथा क्लियरिङ प्रणालीको संरचनागत सुधार गर्ने योजना पनि समावेश गरिएको छ।

यसका साथै ऋण बजार, बन्ड बजार र पूर्वाधार बन्डको विकासमार्फत दीर्घकालीन पूँजी निर्माणलाई प्राथमिकता दिइने नीति तथा कार्यक्रममा उल्लेख गरिएको छ।