शिक्षा मन्त्री पोखरेल र अस्ट्रेलियाका राजदूत साइमनबीच शिष्टाचार भेटवार्ता

काठमाडौँ । शिक्षा, विज्ञान तथा प्रविधि मन्त्री सस्मित पोखरेल र नेपालका लागि अस्ट्रेलियाका राजदूत साइमन अन्स्र्टबीच शिष्टाचार भेटवार्ता भएको छ ।

सिंहदरबारस्थित मन्त्रालयमा सम्पन्न भेटमा दुई देशबीचको द्विपक्षीय सम्बन्ध, शैक्षिक सहकार्य तथा विकास साझेदारीका विभिन्न पक्षबारे विचारविमर्श गरिएको मन्त्रालयले जनाएको छ ।

विशेषगरी उच्च शिक्षामा अन्तरदेशीय शैक्षिक व्यवस्थापन र सहकार्यका सम्भावनाबारे विस्तृत छलफल भएको भेटमा सहभागी स्रोतले जनाएको छ ।

सो अवसरमा मन्त्री पोखरेलले अस्ट्रेलियासँग उच्च शिक्षाका क्षेत्रमा सहकार्य र साझेदारी विस्तार गर्न नेपाल सकारात्मक रहेको उल्लेख गर्दै आवश्यक कानुनी तथा नीतिगत प्रबन्ध अघि बढाइने बताए ।

उनले गुणस्तरीय विश्वस्तरीय शिक्षा स्वदेशमै उपलब्ध गराउने उद्देश्यसहित शिक्षा क्षेत्रमा सुधारका नीति अघि बढाउनुपर्ने आवश्यकता रहेको धारणा राखे । साथै, विद्यालय शिक्षाको सुधारमा अन्य विकास साझेदारहरूसँग जस्तै अस्ट्रेलियासँग पनि सहकार्य विस्तार गर्न मन्त्रालय तयार रहेको उनले स्पष्ट पारे ।

भेटका क्रममा राजदूत अन्स्र्टले उच्च शिक्षामा अन्तरदेशीय शैक्षिक व्यवस्थापनबारे चासो व्यक्त गर्दै अस्ट्रेलियाका विभिन्न शैक्षिक कार्यक्रमसँग नेपालसँगको सहकार्य विस्तार गर्ने इच्छा व्यक्त गरेका थिए ।