चार विपक्षी दलको संयुक्त बैठक भोलि पुनः बस्ने

काठमाडौँ । संघीय संसदमा प्रतिनिधित्व गर्ने चार विपक्षी दलहरूको संयुक्त बैठक भोलि बिहान ११ बजे पुनः बस्ने भएको छ।

बैठक निरन्तरताका लागि सहमति जुटेपछि अर्को चरणको छलफल तय गरिएको हो।

नेपाली कम्युनिस्ट पार्टी (नेकपा) का प्रमुख सचेतक युवराज दुलालका अनुसार आज सम्पन्न छलफलपछि भोलि पुनः बैठक सञ्चालन गर्ने निर्णय गरिएको हो।

यसअघि प्रमुख विपक्षी दल नेपाली काँग्रेसका संसदीय दलका नेता भीष्मराज आङदेम्बेको आह्वानमा चार दलबीच प्रारम्भिक बैठक बसेको थियो। उक्त बैठकमा नेपाली काँग्रेस, नेकपा एमाले, नेकपा (एकीकृत) र राष्ट्रिय प्रजातन्त्र पार्टी (राप्रपा) का प्रतिनिधिहरू सहभागी भएका थिए।

बैठकमा सरकारद्वारा संसद् अधिवेशन स्थगन गरी अध्यादेशमार्फत कानुनी प्रक्रिया अघि बढाइएको विषयमा साझा धारणा बनाउँदै ती कदमप्रति कडा असन्तुष्टि जनाइएको छ। विपक्षी दलहरूले यस्तो अभ्यासलाई असंसदीय भन्दै आपत्ति प्रकट गरेका छन्।

संयुक्त छलफलपछि चारै दलले संयुक्त वक्तव्य जारी गरेका छन्। उक्त वक्तव्यमा काँग्रेस संसदीय दलका नेता आङदेम्बे, एमाले संसदीय दलका नेता रामबहादुर थापा ‘बादल’, नेकपा संसदीय दलका प्रमुख सचेतक युवराज दुलाल तथा राप्रपाकी प्रतिनिधि सरस्वती लामाको हस्ताक्षर रहेको छ।

विपक्षी दलहरूले अध्यादेशमार्फत कानुन निर्माण प्रक्रिया अघि बढाइएको कदमप्रति निरन्तर विरोध जनाउँदै आगामी दिनमा साझा रणनीति तय गर्ने तयारी गरिरहेको जनाइएको छ।