वाम एकतामार्फत कम्युनिस्ट आन्दोलन पुनर्गठन गर्न नेकपाको आह्वान

काठमाडौँ । नेपाली कम्युनिस्ट पार्टी (नेकपा) ले वामपन्थी शक्तिहरूबीच एकता कायम गर्दै कम्युनिस्ट आन्दोलनको पुनर्गठन गर्न आह्वान गरेको छ ।

पार्टी मुख्यालय पेरिसडाँडामा बसेको केन्द्रीय कार्यसंयोजन समितिको बैठकपछि प्रवक्ता प्रकाश ज्वालाले वाम एकतामार्फत राजनीतिक सहकार्य र वैचारिक पुनर्संरचनाको आवश्यकता औँल्याइएको जानकारी दिए ।

उनका अनुसार बैठकले राष्ट्रियता, नेपाली जनताको बलिदानी पूर्ण संघर्षबाट प्राप्त उपलब्धिको रक्षा, सामाजिक न्याय, सुशासन र समृद्धिलाई आधार बनाएर समाजवादोन्मुख नेपाल निर्माणका लागि वाम शक्तिहरू एकताबद्ध हुनुपर्ने निष्कर्ष निकालेको छ ।

बैठकले शान्ति सम्झौताका पक्षधर राजनीतिक शक्तिहरूबीच सहकार्य विस्तार गर्न समेत आग्रह गरेको छ ।

यसैबीच नेकपाले राष्ट्रिय स्वाधीनता, सार्वभौमिकता, भौगोलिक अखण्डता तथा संघीय लोकतान्त्रिक गणतन्त्रको संरक्षण र सुदृढीकरणका लागि देशभक्त तथा लोकतान्त्रिक शक्तिहरूलाई पनि एकजुट भएर अघि बढ्न आह्वान गरेको छ ।