अनेरास्ववियुद्वारा १३ बुँदे ‘टीयू घोषणापत्र’ सार्वजनिक, के-के छन् माग ?

काठमाडौँ । नेकपा एमाले निकट अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) ले १३ बुँदे ‘टीयू घोषणापत्र’ जारी गर्दै शिक्षा, राष्ट्रियता र जनजीविकासँग सम्बन्धित समसामयिक विषयमा आफ्ना धारणा सार्वजनिक गरेको छ।

त्रिभुवन विश्वविद्यालय केन्द्रीय क्याम्पस, कीर्तिपुरमा सम्पन्न संगठनको केन्द्रीय सचिवालय बैठकपछि उक्त घोषणापत्र सार्वजनिक गरिएको हो। बैठकका क्रममा विद्यार्थी संगठनमाथि प्रतिबन्ध लगाउने निर्णयको विरोध स्वरूप पदाधिकारीहरूले ‘बोल्न दे सरकार’ लेखिएको कालो फेटा बाँधेर सांकेतिक प्रदर्शन गरेका थिए।

घोषणापत्रमार्फत संगठनले शैक्षिक क्षेत्रमा संरचनागत सुधार, विद्यार्थी अधिकार संरक्षण तथा सार्वजनिक सरोकारका मुद्दामा राज्यको ध्यानाकर्षण गराएको जनाएको छ। शिक्षा प्रणालीलाई समावेशी, पहुँचयोग्य र गुणस्तरीय बनाउन नीति सुधार आवश्यक रहेको संगठनको धारणा छ।

अनेरास्ववियुले संविधानले सुनिश्चित गरेको शिक्षासम्बन्धी अधिकार कार्यान्वयन गर्न सरकारलाई आग्रह गरेको छ। आधारभूत तहसम्मको शिक्षा पूर्ण रूपमा नि:शुल्क र अनिवार्य बनाउन तथा माध्यमिक तहको शिक्षा पनि नि:शुल्क बनाउने व्यवस्था प्रभावकारी रूपमा लागू गर्नुपर्ने माग घोषणापत्रमा समावेश गरिएको छ।