निफ: सर्वोत्कृष्ट अन्तर्राष्ट्रिय चलचित्र ‘राजागंज’, नाजिर र सुरक्षाले पाए सर्वोत्कृष्ट नायक-नायिकाको अवार्ड

काठमाडौं। नेपाल अन्तर्राष्ट्रिय चलचित्र महोत्सव (निफ) को नवौं संस्करण सम्पन्न भएको हो। सोमबार काठमाडौंको सुन्धारास्थित सिभिल मलमा, नेपाल ललितकला प्रज्ञा(प्रतिष्ठानका कुलपति नारदमणि हार्तम्छालीको प्रमुख आतिथ्यतामा यो महोत्सवको समापन समारोह सम्पन्न भएको हो।

कार्यक्रममा सर्वोत्कृष्ट अन्तर्राष्ट्रिय चलचित्रको अवार्ड दिपक रौनियार निर्देशित ‘राजागञ्जः पूजा सर’ ले जितेको छ। यो फिल्मलाई ट्रफी र पन्ध्र सय अमेरिकी डलर पुरस्कारले सम्मान गरिएको हो।

त्यस्तै, सर्वोत्कृष्ट राष्ट्रिय चलचित्र पुरस्कार समुन्द्र भट्ट निर्देशित ‘गुन्यू चोलो : द ड्रेस’ ले पाएको छ। यो फिल्म ट्रफीसहित एक हजार अमेरिकी डलरले सम्मानित भयो। निर्देशक भट्टले यही फिल्मबाट उत्कृष्ट निर्देशकको अवार्डसमेत जितिन् भने यसै चलचित्रबाट नाजिर हुसेनले पनि सर्वोत्कृष्ट नायकको अवार्ड जिते।

चलचित्र ‘कोशेढुङ्गा’ बाट सुरक्षा पन्तले सर्वोत्कृष्ट नायिकाको अवार्ड जितिन्। राष्ट्रियतर्फ सर्वोत्कृष्ट पटकथाकारको अवार्ड चलचित्र ‘केटी हराएको सूचना’बाट दीपेन्द्र गौचन पाए। सर्वोत्कृष्ट सिनेमेटोग्राफरको अवार्ड चलचित्र ‘कोशेढुङ्गा’ बाटै बाबु श्रेष्ठले पाए।

दक्षिण एसियाली चलचित्र अन्तर्गतको प्रतिस्पर्धामा नेपाली भाषाको भारतीय चलचित्र ‘जार’ सर्वोत्कृष्ट घोषित भएको छ। फुर्वा क्षिरिङ लामा निर्देशित यस चलचित्र पाँच सय अमेरिकी डलरले सम्मानित भएको छ।

त्यस्तै, सर्वोत्कृष्ट अन्तर्राष्ट्रिय डकुमेन्ट्रीको अवार्ड आइसल्यान्डको ‘ग्राउन्ड बिनिथ आवर फिट’ ले पाएको छ। इर्सा रोका फ्यानबर्ग निर्देशित यस डकुमेन्ट्रीले एक हजार अमेरिकी डलर पाएको छ ।

सर्वोत्कृष्ट अन्तर्राष्ट्रिय सर्ट फिल्मको अवार्ड ’सिप’ ले पाएको छ। हादी बाबेइफरद्वारा निर्देशित इरानको यो सर्ट फिल्मले पाँच सय अमेरिकी डलर पाएको हो। सर्वोत्कृष्ट एआई थिम्ड सर्ट फिल्मको अवार्ड जितेको ‘स्पिरिट अफ द माउन्टेन’ ट्रफी र पाँच सय अमेरिकी डलरले सम्मानित भएको छ। यो पाङ जियाद्वारा निर्देशित चिनियाँ सर्ट फिल्म हो।

सर्वोत्कृष्ट विद्यार्थी चलचित्रको अवार्ड मेक्सिकोको चलचित्र ‘पासारिन्हो’ घोषित भएको छ। यो चलचित्रलाई पाँच सय डलर र ट्रफीले सम्मान गरिएको छ।सर्वोत्कृष्ट राष्ट्रिय डकुमेन्ट्री दीपक छोदेन लामाद्वारा निर्देशित ‘होम इज नट अ प्लेस’ र सर्वोत्कृष्ट राष्ट्रिय सर्ट फिल्मको सुरज पौडेलद्वारा ‘रिहाना’ घोषित भए। यी दुवै ट्रफी र पचास हजार रुपैयाँले सम्मानित भए।

डन किहोते सर्वोत्कृष्ट अन्तर्राष्ट्रिय चलचित्रको अवार्ड इरानी फिल्म ‘माई डटर्ज हेयर’ले पाएको छ। हेसाम फराहमान्दद्वारा निर्देशित यस फिल्मलाई प्रमाणपत्रले सम्मान गरिएको छ।

स्पेशल मेन्सन राष्ट्रिय डकुमेन्ट्री ङिमा गेलु शेर्पाद्वारा निर्देशित ‘एज डे गोज बाइ’ घोषित भयो। यसलाई प्रमाणपत्रले सम्मान गरियो। स्पेशल मेन्सन अन्तर्राष्ट्रिय सर्ट फिल्म भारतको ‘हाउसकिप्पर’ घोषित भयो। सुर्या बालाकृष्णद्वारा निर्देशित यस सर्ट फिल्मलाई प्रमाणपत्रले सम्मान गरियो।

स्पेशल जुरी मेन्सन अन्तर्राष्ट्रिय चलचित्र अवार्ड भने चिनियाँ चलचित्र ‘द शोर अफ लाइफ’ घोषित भएको छ। प्रमाणपत्रले सम्मानीत यस फिल्मको निर्देशक ची झाङ हुन्। प्रमुख अतिथि हार्तम्छालीले अवार्ड कार्यक्रम आयोजना गरी विदेशी फिल्म उद्योघसँग नेपाली चलचित्रलाई जोड्ने र सम्बन्ध विस्तारको काम गरेको भन्दै निफका अध्यक्ष केपी पाठकलाई धन्यवाद व्यक्त गरे।

अध्यक्ष पाठकले निफ सफल पार्न सहयोग गर्ने सम्पूर्णमा धन्यवाद व्यक्त गरे। यस संस्करणको निफ चैत १९ गतेबाट सुरु भएको थियो ।