बादलको अभिव्यक्तिप्रति एमाले उपाध्यक्ष पौडेलले जनाए आपत्ति

काठमाडौँ। नेकपा एमालेका उपाध्यक्ष विष्णु पौडेलले पार्टी संसदीय दलका नेता रामबहादुर थापा ‘बादल’को अभिव्यक्तिप्रति आपत्ति जनाएका छन्।

बिहीबार प्रतिनिधि सभाको बैठकलाई सम्बोधन गर्दै थापाले जेन जेड आन्दोलन र रास्वपा सम्बन्धमा टिप्पणी गरेका थिए।

पौडेलले फेसबुकमार्फत भनेका छन्, “प्रतिनिधि सभाको आजको बैठकमा नेकपा (एमाले) को दल नेताको हैसियतले मा. रामबहादुर थापाले व्यक्त गर्नुभएको विचार पार्टीका स्थापित नीति र मान्यता विपरीत छन्।”

उनी भोलि हुने केन्द्रीय समितिको बैठकमा उक्त अभिव्यक्तिप्रति छलफल र निर्णय हुने अपेक्षा राखेका छन्।

थापाले जेन जेड आन्दोलन, नेपाली सेना र सुशीला कार्की नेतृत्वको सरकारमाथि प्रश्न उठाएका थिए, जसलाई पार्टीको आधिकारिक नीति र धारणा अनुरूप होइन भनी उपाध्यक्ष पौडेलले देखाएका छन्।