यस्तो छ २०८३ सालमा बैंक खुल्ने समय र विदाको सूची

काठमाडौँ । नेपाल राष्ट्र बैंकले आर्थिक वर्ष २०८३ का लागि लागू हुने बैंक बिदा तथा सेवा सञ्चालनसम्बन्धी तालिका सार्वजनिक गरेको छ। 

राष्ट्र बैंकअन्तर्गत मानव संसाधन व्यवस्थापन विभागले सार्वजनिक गरेको विवरणअनुसार उक्त वर्षमा कुल ३५ दिन बैंक बिदा रहनेछ, जसलाई विभिन्न श्रेणीमा वर्गीकरण गरिएको छ।

सूचना अनुसार बिदा बाहेकका दिनमा वर्षको समयावधिअनुसार बैंक तथा वित्तीय संस्थाको सेवा समय फरक–फरक रहने व्यवस्था गरिएको छ। वैशाख १ देखि कात्तिक १५ सम्म तथा माघ १६ देखि चैत मसान्तसम्म बिहान १० बजेदेखि साँझ ५ बजेसम्म कार्यालय सञ्चालन हुनेछ। त्यसैगरी कात्तिक १६ देखि माघ १५ सम्म सेवा समय घटाई बिहान १० बजेदेखि साँझ ४ बजेसम्म कायम गरिनेछ।

साप्ताहिक रूपमा प्रत्येक शुक्रबार बैंकहरू सीमित समयका लागि मात्र खुल्नेछन्। उक्त दिन बिहान १० बजेदेखि दिउँसो १:३० बजेसम्म मात्र सेवा उपलब्ध हुने व्यवस्था गरिएको छ।

त्यस्तै बैंकिङ कारोबार सञ्चालनको समय पनि मौसमअनुसार समायोजन गरिएको छ। वैशाख १ देखि कात्तिक १५ सम्म तथा माघ १६ देखि चैत मसान्तसम्म कारोबार समय बिहान १० बजेदेखि साँझ ४ बजेसम्म रहनेछ। कात्तिक १६ देखि माघ १५ सम्म भने कारोबार समय बिहान १० बजेदेखि दिउँसो ३ बजेसम्म रहनेछ।