बारा काँग्रेसमा आन्तरिक विवाद चर्कियो

काठमाडौँ । प्रतिनिधि सभा निर्वाचनको सन्दर्भमा असहयोग र अन्तर्घातको आरोपसँगै नेपाली काँग्रेस बारा जिल्लाभित्र आन्तरिक विवाद तीव्र बन्दै गएको छ।

बारा क्षेत्र नम्बर ४ बाट उम्मेदवारी दिएका श्यामबाबु गुप्ताले जिल्ला सभापति राजेश राय यादवसहित केही पदाधिकारीविरुद्ध अनुसन्धानात्मक कारवाहीको माग गर्दै केन्द्रीय नेतृत्वसमक्ष औपचारिक निवेदन दिएका छन्।

गुप्ताले आफ्नो उजुरीमा निर्वाचन प्रक्रियामा सहयोग नगरेको र पार्टी उम्मेदवारलाई हराउन भूमिका खेलेको आरोप लगाउँदै सम्बन्धित व्यक्तिहरूलाई पार्टी सदस्यताबाट निलम्बन गर्नुपर्ने माग अघि सारेका छन्। उनले जिल्ला उपसभापति अमेरिला पाल तथा पूर्व संविधानसभा सदस्य शोभाकर पराजुलीलगायतका नेताहरूको नाम समेत उल्लेख गरेका छन्।

यसैक्रममा क्षेत्र नम्बर ४ का सभापति सुनिल गुप्ता, पूर्व महाधिवेशन प्रतिनिधि कृवष व्रत सिंह, बारा-४ (ख) का सभापति सुमनकुमार भट्टराई र जितपुर-सिमरा नगर कार्यसमिति सभापति छाबिलाल शर्मामाथि पनि आवश्यक अनुसन्धानात्मक कारबाही हुनुपर्ने उनको माग छ।

यसअघि नै बारा-२ का उम्मेदवार भैयाराम प्रसाद यादवले पनि जिल्ला सभापति यादवलाई पार्टीबाट निष्कासन गर्नुपर्ने माग उठाइसकेका छन्। त्यस्तै, बारा-३ क्षेत्रीय कार्यसमितिले समेत जिल्ला नेतृत्वसहित १६ जनामाथि निर्वाचनमा अन्तर्घात गरेको आरोप लगाउँदै केन्द्रीय तहमा कारबाही सिफारिस गरेको थियो।