कर्णालीमा पहिलो दल काँग्रेस

काठमाडौँ । पाँच निर्वाचन क्षेत्रमा विजयी हुँदै कर्णालीमा काँग्रेस पहिलो दल बनेको छ । काँग्रेसबाट जाजरकोटमा खडकबहादुर बुढा, हुम्लामा जयपति रोकाया, दैलेख-१ मा वासना थापा र मुगुमा खडक शाही विजयी भएका हुन् ।  

काँग्रेसले दैलेख-१ मा एमालेको र हुम्ला र जाजरकोटमा माओवादीको विरासत तोडेको हो । यसअघि जितेको सुर्खेत-२ र दैलेख-२ गुमाएको छ । यसअघि काँग्रेस उम्मेदवार विजयी भएको सुर्खेत-२ मा रास्वपाका रमेश सापकोटा र दैलेख-२ मा एमालेका लक्ष्मीप्रसाद पोखरेल विजयी भएका छन् । १२ निर्वाचन क्षेत्र रहेको कर्णालीमा नेकपाले ४ तथा रास्वपा, एमाले र राष्ट्रिय प्रजातन्त्र पार्टी एकरएक क्षेत्रमा विजयी भएका छन् । 

जाजरकोटमा काँग्रेस कार्यवाहक जिल्ला सभापति खडकबहादुर बुढा २० हजार १४२ मतसहित विजयी भए । बुढा २०७४ सालमा शिवालय गाउँपालिको अध्यक्ष पदमा पराजित भएका थिए । नेपाल विद्यार्थी संघबाट राजनीति थालेका उनी २०६४ सालमा भेरी ज्ञानोदय क्याम्पसको स्ववियू सभापति थिए ।