काठमाडौँ । नेपाल कम्युनिस्ट पार्टी (एमाले)सँग सम्बद्ध प्रोग्रेसिभ इन्जिनियर्स एसोसिएसन नेपाल (पिन)ले संघीय निर्वाचनलाई लक्षित गर्दै देशभर ३९९ जना इन्जिनियरलाई निर्वाचन क्षेत्र स्तरमा जिम्मेवारी प्रदान गरी परिचालन गरेको जनाएको छ।
संगठनका अनुसार केन्द्रीय समिति बैठकको निर्णय, प्रदेश तहबाट प्राप्त सुझाव तथा समग्र राजनीतिक परिस्थितिलाई ध्यानमा राखेर सम्बन्धित प्राविधिक जनशक्ति छनोट गरिएको हो। परिचालित इन्जिनियरहरूलाई निर्वाचन क्षेत्रमा समन्वय, रणनीतिक सहयोग तथा प्राविधिक परामर्श प्रदान गर्ने कार्य तोकिएको छ।
उपलब्ध विवरणअनुसार सबैभन्दा धेरै इन्जिनियर बागमती प्रदेशमा १३४ जना रहेका छन्। संघीय राजधानी तथा केन्द्रीय संरचनाको केन्द्रित उपस्थिति भएका कारण उक्त प्रदेशमा प्राविधिक जनशक्ति बढी देखिएको बताइएको छ। त्यसैगरी लुम्बिनी प्रदेशमा ७०, कोशी प्रदेशमा ६७, गण्डकी प्रदेशमा ४८, मधेश प्रदेशमा ४३ तथा कर्णाली प्रदेशमा ३१ जना इन्जिनियर जिम्मेवारीसहित खटिएका छन्। सबैभन्दा कम संख्या सुदूरपश्चिम प्रदेशमा ६ जना रहेको उल्लेख छ।
प्रदेशगत वितरणमा संघीय संरचनाअनुसार सन्तुलन कायम गर्ने प्रयास गरिएको संगठनको भनाइ छ। प्रतिस्पर्धात्मक निर्वाचन क्षेत्रका रूपमा हेरिएको कोशी प्रदेशअन्तर्गत झापा-५ क्षेत्रमा चार जना इन्जिनियर प्रत्यक्ष जिम्मेवारीमा रहेको जानकारी दिइएको छ।
संगठनका अध्यक्ष ई. डा. भेषराज थापाका अनुसार परिचालित प्राविधिक जनशक्तिले एमालेद्वारा गठन गरिएका निर्वाचन परिचालन समितिसँग सहकार्य गर्दै घोषणा-पत्र तयारी, प्रचार रणनीति निर्माण, तथ्यांक विश्लेषण तथा सामग्री व्यवस्थापनमा परामर्श दिनेछन्। आवश्यकतानुसार अन्य गतिविधिमा समेत सहकार्य गरिने बताइएको छ।
प्रतिक्रिया दिनुहोस
सफल खबर संवाददाता
सोमबार, ०४ फागुन २०८२, १३ : ४४
लेखकबाट थप