चुनावको मुखमै रास्वपा सभापति रवि लामिछाने भारत जाँदै

काठमाडौं । राष्ट्रिय स्वतन्त्र पार्टीका सभापति रवि लामिछाने चुनावको मुखैमा भारत जाने भएका छन् । भारतको बैङलोरमा रास्वपाको प्रवासी नेपाली सम्पर्क मञ्चले आयोजना गर्ने कार्यक्रममा सहभागी हुने गरी सभापति लामिछाने कर्नाटक जान लागेका हुन् ।

भारत पुग्दा उनी त्यहाँ झण्डै एक साता बस्ने गरी जाने तयारीमा रहेको बताइएको छ । रास्वपा उच्च स्रोतका अनुसार उनी केही दिनमै त्यसतर्फ जाने गरी तयारीमा रहेका छन् । प्रतिनिधिसभा चुनाव फागुन २१ मा हुादैछ । अब चुनाव आउन एक महिना पनि बाँकी नरहँदा उनी भारत जान लागेको विषयलाई राजनीतिक बृतमा निक्कै चासोका साथ हेरिएको छ । 

रास्वपाको प्रवासी नेपाली सम्पर्क मञ्चको कार्यक्रम देखाएपनि त्यहाँ उनले भारतका केही उच्चपदस्थ राजनीतिककर्मीहरुसँग समेत भेट गर्ने उदेश्यले भारत जान लागेको बताइएको छ । भारतको यो राज्य नेपालको सुदूरपश्चिमसँग जोडिएको प्रदेश हो । 

यस अगाडी सोही स्थानमा आयोजित कार्यक्रममा रास्वपाका नेताहरु सोविता गौतम र हरि ढकाल सहभागी भएका थिए । त्यसक्रममा उनीहरुले भारतीय जनता पार्टी (भाजपा)का नेता समेत रहेका पूर्व पूर्वउपराष्ट्रपति एम वेंकैया नायडूसँग भेटवार्ता गरेका थिए । अन्य भारतीय नेताहरुसँग पनि उनीहरुले त्यसक्रममा भेट गरेका थिए । 

सभापति लामिछानेले फागुन २१ को चुनाव लक्षित गरेर भारतमा रहेका नेपालीहरुलाई मतदान गर्न नेपाल आउन प्रेरित गर्ने र त्यस अनुसारको माहोल बनाउन प्रवासी मञ्चको आयोजनामा कार्यक्रम राखिएको र त्यसलाई सभापति लामिछानेले सम्वोधन गर्ने बताइएको छ ।

यधपी लामिछानेले भारत जान लागेको विषय अहिलेसम्म औपचारिक जानकारी भने दिएका छैनन । रास्वपा स्रोतले दिएको जानकारी अनुसार, त्यसको तयारी भित्री रुपमा भईरहेको बताइएको छ ।

देशभित्र आसन्न चुनावलाई लिएर रास्वपाको चर्चा चुलिएको छ । त्यही क्रममा भारतीय सत्तासिन पार्टी देखि विपक्षी भारतीय कांग्रेस आईसम्मले पनि नेपालको चुनावलाई चासोका साथ हेरिरहेका छन् । 

नेपालमा चुनाव पछि कुन दल ठूलो बन्छ ? कसको सरकार बन्छ ? भन्ने विषयमा भारतीय नेताहरुको मसिनो चासो रहेको देखिन्छ । त्यही भारतीय चासोका बीच रास्वपा सभापति लामिछाने भारत भ्रमणमा जान लागेकोले राजनीतिक बृत तातिएको छ ।