मन्त्री पद त्याग गरी राजनीतिक मैदानमा कुलमान

काठमाडौँ । ऊर्जा, जलस्रोत तथा सिँचाइ, भौतिक पूर्वाधार तथा यातायात र शहरी विकास गरी तीनवटा शक्तिशाली मन्त्रालयको जिम्मेवारी सम्हालेका कुलमान घिसिङले मन्त्री पदबाट राजीनामा दिएका छन् । बुधबार राति प्रधानमन्त्री सुशीला कार्कीलाई राजीनामा बुझाएसँगै उनले आफ्नो आगामी यात्रा दलीय राजनीतिमा केन्द्रित हुने औपचारिक घोषणा गरेका हुन् ।

 जेन–जी आन्दोलनपछि गठित ‘नागरिक सरकार’ मा विज्ञ मन्त्रीका रूपमा भित्रिएका घिसिङले पछिल्लो समय दलीय आबद्धताका कारण नैतिक प्रश्न झेल्नुपरेको थियो, जसको निकासका लागि उनले पदभन्दा राजनीति रोज्ने निर्णय लिएका हुन् ।

राजीनामासँगै घिसिङ अब औपचारिक रूपमा राष्ट्रिय स्वतन्त्र पार्टी (रास्वपा) मार्फत आगामी फागुन २१ गते हुने निर्वाचनमा होमिने भएका छन् । पत्रकार सम्मेलनमा बोल्दै उनले आजदेखि नै आफ्नो नयाँ राजनीतिक जीवन सुरु हुने र ‘उज्यालो नेपाल’ बनाउने अभियानलाई अब राजनीतिक रूपमै अघि बढाउने उद्घोष गरे । प्रधानमन्त्री सुशीला कार्कीले निर्वाचनमा उठ्न चाहने मन्त्रीहरूलाई पद छोडेर मार्गप्रशस्त गर्न निर्देशन दिएपछि घिसिङले पदभन्दा सिद्धान्त र जनताको चाहनालाई माथि राख्दै बाहिरिने निर्णय लिएका हुन् । उनी आगामी निर्वाचनमा काठमाडौँ क्षेत्र नम्बर ३ बाट उम्मेदवार बन्ने तयारीमा छन् ।

आफ्नो करिब चार महिनाको कार्यकालमा घिसिङले विकास निर्माणका बेथितिविरुद्ध केही काम गरे । वर्षौँदेखि अलपत्र रहेका झापाको कन्काई पुलदेखि राष्ट्रिय गौरवको सुनकोशी–मरिन आयोजनासम्मका करिब ६६ वटा रुग्ण ठेक्का तोड्नु उनको कार्यकालको सबैभन्दा साहसिक कदम मानिएको छ । काम नगरी आयोजना बन्धक बनाउने निर्माण व्यवसायीहरूको प्रवृत्तिलाई उनले कडा कारबाहीको दायरामा ल्याए । ऊर्जा क्षेत्रमा वर्षौँदेखि थाती रहेको डेडिकेटेड र ट्रंक लाइनको प्रिमियम महसुल उठाउने अडान र नेपाल–भारतबीच ५००० मेगावाटसम्म विद्युत् व्यापार गर्न सकिने गरी भएको दूरगामी सम्झौताले उनको प्रशासकीय क्षमतालाई पुन: पुष्टि गरेको छ ।

शहरी विकासतर्फ पनि उनले उल्लेखनीय सुधारको जग बसालेका छन् । जेन–जी आन्दोलनका क्रममा क्षति पुगेका सरकारी संरचनाहरूको तीव्र पुनर्निर्माण, कीर्तिपुर क्रिकेट रंगशालाको गुरुयोजना स्वीकृति र त्रिवि क्रिकेट मैदानको स्तरोन्नति जस्ता काम उनकै नेतृत्वमा सम्भव भए । यस्तै, मेलम्चीको पानी काठमाडौँ ल्याउन देखिएको अवरोध हटाउनेदेखि बीपी राजमार्गलाई अस्थायी रूपमा सञ्चालनमा ल्याउनेसम्मका कार्यले जनतामा आशा जगाएको थियो । 

बुधबार साँझ बालुवाटारमा आयोजित बिदाइ कार्यक्रममा प्रधानमन्त्री सुशीला कार्कीले घिसिङको कामको खुलेर प्रशंसा गरिन् । प्रतिकूल अवस्थामा सरकारमा सहभागी भएर घिसिङले मन्त्रालयमा सुशासन र पारदर्शिताका लागि पुर्‍याएको योगदानलाई देशले सम्झिरहने प्रधानमन्त्रीको भनाइ थियो । प्रधानमन्त्रीले उनलाई सम्मानस्वरूप खादा ओढाउँदै भविष्यको राजनीतिक यात्राका लागि शुभकामना समेत दिइन् । जेन–जी युवाहरूको मागअनुसार नै उनलाई सरकारमा ल्याइएको र निर्वाचनपछि पनि राजनीतिमा जान सक्ने गरी व्यवस्था गरिएको प्रधानमन्त्रीले स्पष्ट पारिन् ।

यद्यपि, घिसिङको बिदाइ पूर्णतः सुमधुर भने रहेन । उनी मन्त्री पदमा रहँदै रास्वपाको उपसभापति बन्ने समझदारी भएको र उनी संरक्षित उज्यालो नेपाल पार्टी रास्वपामा बिलय भएपछि ‘नागरिक सरकार’ को मर्मविपरीत काम गरेको भन्दै आलोचना भइरहेको थियो । राजीनामापछि आफ्ना मान्छे नियुक्त गर्न दबाब दिएको भन्ने आरोपलाई उनले नियोजित र भ्रामक भन्दै कडा खण्डन गरेका छन् । राजनीतिमा औपचारिक प्रवेश गरेपछि मात्र पार्टी सदस्यता लिने आफ्नो अडान रहेको उनले स्पष्ट पारे ।

अब उनी रास्वपाको सदस्यता दिएर प्रशासक र मन्त्रीको भूमिकाबाट रूपान्तरित भएर पूर्णकालीन राजनीतिज्ञका रूपमा जनताको बीचमा जानेछन् ।