कर्तव्य ज्यान मुद्दाका फरार प्रतिवादी २२ वर्षपछि पक्राउ

काठमाडौँ । २२ वर्षपछि नेपाल प्रहरीले कर्तव्य ज्यान मुद्दाका फरार प्रतिवादीलाई पक्राउ गरेको छ ।

पक्राउ पर्नेमा म्याग्दीको रघुगंगा गाउँपालिका-४ का ४३ वर्षीय खेमबहादुर थजाली छन् । उनलाई जिल्ला प्रहरी कार्यालय म्याग्दीले बेनी नगरपालिका-८ कालिपुलबाट पक्राउ गरेको हो ।

प्रहरीका अनुसार थजालीसमेतका व्यक्तिले ६ कात्तिक २०६० मा म्याग्दीको साविक दग्नाम गाविस-२ बस्ने धनराम तिलिजाको हत्या गरेका थिए । घरमा सुतिरहेका तिलिजालाई धारिलो हतियार प्रहार गरी हत्या गरिएको थियो । यो मुद्दामा उनलाई म्याग्दी जिल्ला अदालतले २९ चैत २०६३ मा १९ वर्ष ७ महिना कैद सजाय तोकेको थियो ।

हाल उनलाई नियन्त्रणमा लिएर जिल्ला अदालतमार्फत लगत कट्टाको लागि कारागार कार्यालय म्याग्दीमा पठाइएको प्रहरीले जनाएको छ ।