कांग्रेसमा पूर्णबहादुर असफल भएको संस्थापनकै निश्कर्ष

काठमाडौं । नेपाली कांग्रेसका कार्यवाहक सभापति पूर्णबहादुर खड्का पार्टीभित्रको आन्तरिक विवाद मिलाउन पूर्णतः असफल भएको निश्कर्ष कांग्रेसकै संस्थापन पक्षका सात पूर्व पदाधिकारीले निकालेका छन् । 
कार्यबाहक सभापतिले चुनाव अगाडी महाधिवेशन गर्ने की पछाडी गर्ने ? नियमित महाधिवेशन गर्ने की विशेष महाधिवेशन गर्ने भन्ने विवादमा निरुपण गर्न नसक्दा कांग्रेसको बैठक लम्बेको लम्ब्यै छ । 

आजका लागि बोलाइएको बैठक समेत फेरि ४ मंसिरमा गर्ने गरी सरेको छ । उपचारका लागि सिंगापुर पुगेका देउवा शुक्रवार स्वदेश फर्किसकेका छन् । उनले शनिबार एकदिन आराम गरेर आइतबार देखि सक्रिय हुन थालेका छन् ।

पूर्व महामन्त्री समेत रहेका नेता कृष्ण सिटौलासहितका ७ जना पूर्व पदाधिकारीले सभापति देउवालाई नै पूनः कांग्रेसको सक्रिय राजनीतिमा फर्काउन दौडधुप थालेका छन् ।

कांग्रेसभित्रको विवादका बारेमा कार्यबाहक सभापति खड्काले पक्ष विपक्षमा कुनै निर्णय  नलिने भन्दै सभापति देउवासँग परामर्शमा निर्णय लिन बैठक सार्न थालेका थिए  । महामन्त्रीद्दय विश्वप्रकाश शर्मा र गगन थापाले चुनाव अगाडी सके नियमित महाधिवेशन नसके विशेष महाधिवेशन गर्नुपर्ने मत राख्दै आएका थिए । यही आधारमा कांग्रेसमा विवाद छ । 

सिटौलाले आफैं अबको महाधिवेशनबाट सभापति बन्न र देउवाको साथ खोज्न चाहिरहेका छन् । त्यसका लागि कार्यवाहक सभापति पूर्णवहादुर खड्कालाई नेतृत्व गर्न सक्षम नरहेको देखाउन सके आफुमा देउवाको साथ सर्न सक्ने ठानेपछि खड्कालाई असफल देखाउन चाहिरहेका छन् ।

पूर्व पदाधिकारीहरु सिटौला, प्रकाशमान सिंह, विमलेन्द्र निधि, डा शंशाक कोइराला, प्रकाशशरण महतसहितका सात पदाधिकारीले पूर्णवहादुर समस्या समाधानमा असफल भएको निश्कर्षमा छन् । देउवाले आइतबार पूर्णवहादुर खड्कासँग लामो सम्वाद गरेका थिए । त्यसपछि एकपछि अर्काे गदै अन्य नेताहरुलाई पनि भेटघाट गरिरहेका छन् ।