स्लोभाकियामा वैदेशिक रोजगारीको नाममा गोल्डेन फिडरको ठगी पर्दाफास, यसरी भयो ‘सेटिङ’

चितवन । युरोपेली मुलुक स्लोभाकियामा वैदेशिक रोजगारीका नाममा भइरहेको ठूलो ठगी धन्दा बाहिर आएको छ। लाखौँ रुपैयाँ बुझाएर पठाइएका सयौँ नेपाली श्रमिक अहिले रोजगारी र कानुनी सुरक्षाविहीन अवस्थामा अलपत्र परेका छन्।

पीडितका अनुसार पाँच महिनाअघि भरतपुर–१४ का राम बिक (नाम परिवर्तन) सहित करिब २०० जना श्रमिकलाई ‘वर्क कन्ट्रोल’ नामक भिजा मार्फत स्लोभाकिया पठाइएको थियो। तर, उनीहरूलाई वाचा गरिएको काम आजसम्म प्राप्त भएको छैन।

करिब सय जना अझै बेरोजगार छन् भने बाँकीलाई भिन्न काममा लगाइएर वाचा गरिएको तलबको आधा मात्र, अर्थात् मासिक ४५० युरो दिइरहेको पीडितको गुनासो छ। पठाउँदा मासिक १,००० युरो तलब, साथै खाना र आवास सुविधा दिने भनिए पनि ती सुविधाहरू पनि पर्याप्त छैनन्।

स्थानीय दलाल र ठग नेटवर्क

श्रमिकहरूलाई पठाउने जिम्मा भरतपुरका सुरेश परियार र नारबहादुर क्षेत्रीलाई दिइएको पाइएको छ। उनीहरूले नयाँ कामदार पठाउँदा प्रति व्यक्ति १४ लाख रुपैयाँसम्म असुल्ने, तर रसिद वा बिल नदिने गरेको खुलासा भएको छ।

यस ठगी सञ्जालमा भारत र बंगलादेशका व्यक्तिहरूको संलग्नता पनि भेटिएको छ। भारतको नोएडा, सेक्टर–१५ मा रहेको कम्पनी यसमा प्रत्यक्ष संलग्न रहेको प्रमाण खुलेको छ। सो कम्पनीको प्रशिक्षण केन्द्र काठमाडौं त्रिपुरेश्वरस्थित वर्ल्ड ट्रेड सेन्टरमा रहेको बताइन्छ।

पीडितहरूले दिएका विवरणअनुसार भारतीय नागरिक अनुप र अखिल, साथै बंगलादेशी नागरिक राजा र जिङ्गो नामका व्यक्तिहरू पनि यस धन्दामा संलग्न छन्। नेपालतर्फ गोल्डेन फिडर ओभरसिजको कार्यालय भरतपुर बाइपास रोडमा रहेको खुलेको छ।

भिसा र कानुनी संकट

स्लोभाकिया पठाउँदा श्रमिकहरूलाई तीन महिनाको नेशनल डी–भिसा दिइएको थियो। तर, त्यहाँ पुगेपछि एक साताभित्र दिने भनिएको टेम्पोररी रेसिडेन्स कार्ड (टीआरसी) अहिले पाँच महिना बित्दा पनि नपाएका कारण उनीहरू कानुनी जोखिममा परेका छन्। टीआरसी नभएपछि न रोजगारी पाउन सक्ने अवस्था छ, न त बसाइ सुरक्षित।

उनीहरूलाई वैदेशिक रोजगार विभागको अनुमति बिना पठाइएको हुँदा अहिले पीडितहरू कुनै पनि कानुनी सहायताबाट वञ्चित छन्। विभागका प्रवक्ता चन्द्रबहादुर सिवाकोटीले श्रम स्वीकृतिबिना पठाइने यस्ता अवैध गतिविधिबाट सचेत रहन आग्रह गर्दै विभागले ठगी रोक्न विभिन्न सचेतनामूलक कार्यक्रम सञ्चालन गर्दै आएको बताए।

पीडितको गुहार

स्लोभाकियामा अलपत्र परेका नेपालीहरूले नेपाल सरकारलाई तत्काल हस्तक्षेप गर्न माग गरेका छन्। उनीहरूको भनाइ छ —“हामीलाई राम्रो तलब दिने भनेर ल्याइयो, तर पाँच महिना बित्दा रोजगारी पाएका छैनौँ। लाखौँ खर्च गरेर आउँदा यहाँ अलपत्र परेका छौँ — फर्किन पनि नसक्ने, बस्न पनि नसक्ने, काम गर्न त झन् नसक्ने अवस्थामा छौँ।”

पीडितहरूले ठगीमा संलग्न कम्पनीका कर्मचारीले ट्याक्ससम्म हेरफेर गरेर अवैध लेनदेन चलाइरहेको प्रमाणसहितका भिडियो समेत पठाएका छन्।

कसरी भारत, बंगलादेश र नेपालका एजेन्टहरूले ‘गोल्डेन फिडर ओभरसिज’मार्फत ठगी सञ्जाल चलाए भन्नेबारे थप फलोअप क्रमश: गरिनेछ ।