ओलीलाई गुण्डुमै कुटी बनाएर राख्ने महेश बस्नेतको घोषणा

काठमाडौँ । नेकपा एमालेका नेता महेश बस्नेतले अध्यक्ष केपी शर्मा ओलीलाई गुण्डुमै कुटी बनाएर राख्ने घोषणा गरेका छन् ।

बुधबार जेनजी आन्दोलनकारीले जलाइदिएको बालकोटस्थित घर हेर्न पुगेका ओलीसँगै पुगेका बस्नेतले यस्तो घोषणा गरेका हुन् । उनले उक्त घर ओली कुटी भनेर बनाइदिने बताएका छन् ।

उनले भने, ‘उहाँको परिवार बच्चा बच्ची नभएको र उहाँले सबैलाई बच्चा बच्ची सरहै मान्ने भएको हुनाले उहाँको लागि त धेरै जग्गा जमिन चाहिँदैन । उ बेलामा भए राम कुटी भन्थे अहिले ओली कुटीका हिसाबले हामी उहाँहरूलाई नजिकै गुण्डु त्यो चाहिँ २ नम्बर वडा सूर्यविनायकको हामी चाहिँ ७ नम्बर वडामा बस्ने वासस्थानको व्यवस्था चाहिँ हामी गुण्डुमा गराइदिन्छौ । उहाँ बस्नको लागि हामी यहाँ थप खर्च गर्दैनौँ । हामी गुण्डुमा उहाँलाई बस्ने एउटा नामै ओली कुटी राखेर बनाइ दिँदैछौं । त्यही भएर उहाँको लागि बालकोटमा खर्च गर्दैनौँ ।’

उनले आन्दोलनकारीले जलाइदिएको ओलीको घर मर्मत नगरिने बताएका छन् ।

बस्नेतले ओलीको जलाइएको सबै घर ओलीको नभएको बताए । उक्त घरहरू राष्ट्रिय सम्पत्तिको रूपमा रहेको उनले दाबी गरे ।