‘मलाई जबरजस्ती निकालिएको हो, समातेर कस्टडीमा राखे हुन्छ’ : रवि लामिछाने

काठमाडौँ । राष्ट्रिय स्वतन्त्र पार्टीका सभापति रवि लामिछानेले आफूलाई कारागारबाट जबरजस्ती निकालिएको प्रष्टीकरण दिएका छन् । आफूलाई ‘कस्टडी’मा राख्नका लागि सुरक्षा प्रमुखहरूलाई भनेको उनको दाबी छ ।

रवि लामिछानेले फेसबुक लाइभमा आएर भनेका छन्, ‘म आफूले चाहेर निस्किएको होइन । सुरक्षा दिन सकिन्न भनेर मलाई जबरजस्ती बाहिर निकालिएको हो । मलाई जस्तो पत्र दिइयो, जस्ताको तस्तै सार्वजनिक गरेको छु ।’

उनले आजै नेपाल प्रहरी र सशस्त्र प्रहरीसँग आफूले कुरा गरेर फेरि थुन्न भनेको बताए ।

लामिछानेले भने, ‘तपाईँहरूले मलाई आफ्नो कस्टडीमा राख्नुस् या कारागारमा पठाउनुस् भनेर उहाँहरूलाई भनेँ । उहाँहरूले आफै सुरक्षित बस्नुस्, परेको बेला आफैँ सम्पर्क गर्छौँ भन्नुभयो । सुरक्षा दिन नसकेरै पत्र दिएको होला भन्ने कुरा गर्नुभयो ।’

उनले आजै न्यायिक निकायहरूलाई पनि औपचारिक जानकारी गराएको बताए । आफू सरकार बनाउने र सरकारमा दौडमा नरहेको उनले प्रष्ट पारे ।

‘मेरो नाममा विवाद गर्नु जरुरी छैन । मलाई डिफेम गर्न पर्दैन । म यो रेसमा नै छैन । झूटो मुद्दा अझै खेपिरहेको छु । प्रहरीले आफैँ सुरक्षित बस भन्छ । बाटोमा जा भन्छ । बाटोमा आगो लिएर बसेको भिड छ । अब भन्नुस् मैले बाँच्न पाउने कि नपाउने रु काँग्रेस एमालेदेखि जेन जेडसम्म आउँदा ममाथिको अन्याय नरोकिने नै हो त ?’ उनले प्रश्न गरे ।