जेलमा रहेका अपराधी उम्काउन जेन जीले आन्दोलन गरेका थिएनन् : पदम गिरी

काठमाडौं । नेकपा एमालेका सांसद पदम गिरीले प्रधानमन्त्री केपी ओलीको राजीनामा पछि पनि सरकारी निकाय जलाउँदा पनि राज्यका जिम्मेवार निकायहरू मूकदर्शक बन्नु डरलाग्दो र धेरै पछिसम्म झस्काउने विषय बन्ने बताएका छन्।

जेन जीको शान्तिपूर्ण आन्दोलनमा स्वार्थी समूहको घुसपैठ गराएर आन्दोलनलाई भड्काउने काम हुँदा पनि सुरक्षा निकायको सतर्कता, सजगता र संयमता नदेखिएको उनको बुझाइ छ।

उनले भनेका छन्, ‘देशमा सुशासन कायम होस,विकासको मूल फुटोस् , युवाले देशमा नै रोजगारी सहितको सम्मानित र सुरक्षित जीवन जिउने उज्यालो भविष्यको खोजी गर्न सकौँ भनी नयाँ पुस्ता शान्तिपूर्ण आन्दोलनमा आउनु भएको थियो । तथापि भदौ २३ गते,एकातर्फ देश बन्नु पर्दछ भन्ने पवित्र उद्देश्य बोकेको जेन जीको शान्तिपूर्ण आन्दोलनमा स्वार्थी समूहको घुसपैठ गराएर आन्दोलनलाई भड्काउने काम भयो भने अर्को तिर सुरक्षा निकायको सतर्कता, सजगता र संयमता पनि देखिएन।’