लागु औषधसहित दुई पक्राउ

काठमाडौँ । नौ ग्राम २३० मिलिग्राम लागुऔषध (खैरो हेरोइन)सहित दुई जनालाई प्रहरीले पक्राउ गरेको छ । गोदावरी नगरपालिका-१ बिजौराका २७ वर्षीय राजु चौधरी र टीकापुर नगरपालिका-६ नारायणपुरबाट सोही ठाउँका ४१ वर्षीय नारायण डंगौरालाई छुट्टाछुट्टै स्थानबाट पक्राउ गरेको हो ।

जिल्ला प्रहरी कार्यालयका अनुसार राजुले चलाएको से ३ प ५१४१ नम्बरको मोटरसाइकल बिजौरास्थित माछा पोखरी नजिक चेकजाँच गर्दा अगाडिको भाइजरमुनि हेन्डिलको गार्डको प्वालभित्र लुकाइछिपाइ राखेको अवस्थाबाट नौ ग्राम खैरो हेरोइन बरामद गरिएको छ ।

यस्तै, टीकापुर नगरपालिका-६ स्थित नारायणपुर चोकमा हिँडिरहेको नारायणलाई शंका लागि चेकजाँच गर्दा उनको साथबाट २३० मिलिग्राम खैरो हेरोइन बरामद गरिएको छ । लागु औषधसहित पक्राउ परेका दुवै जनालाई आवश्यक कारबाहीका लागि हिरासतमा राखेर थप अनुसन्धान भइरहेको जिल्ला प्रहरी कार्यालयले जनाएको छ ।